中國跳水王子田亮係咪殺入娛樂圈已經傳咗幾個月，田亮經理人劉韜日前接受內地傳媒訪問時，終於將謎底揭開，結果就係英皇只要答應三項條件，包括保證田亮能夠參加全運會、亞運會同埋○八年北京奧運會，田亮就會喺十日之內簽約。
劉韜話英皇打算將田亮捧為中國碧咸，但畢竟英皇名氣響，令田亮造成好大壓力，早排田亮同劉韜提過，話如果唔係簽畀英皇就好啦，足以證明田亮對加入娛樂圈，確係曾經猶豫過。
田亮貴為內地泳壇之寶，國家花咗咁多時間同心機培訓佢，所以劉韜話田亮簽英皇後一定會繼續佢嘅跳水生涯，而郭晶晶暫時都會專心跳水，唔會加入娛樂圈。
至於英皇高層吳雨就同內地記者話同田亮係密切接觸中，如無意外喺本月底或下月頭就會簽約，聽聞田亮做咗謝霆鋒師弟後，計劃先喺下個月拍攝個人寫真集，大概喺明年情人節推出。
馮仁昭知道英皇簽田亮都係安排佢拍廣告同電影為主，如果唔影響佢跳水都冇壞嘅，捧佢做中國碧咸，有佢名氣咁大同咁多fans就好，不過就千祈唔好學似碧咸有咁多風流帳至得！
孫燕姿噚日喺台灣為最新專輯《Stefanie》舉行發布會，大會將場地設計成法國凡爾賽宮咁，氣勢磅礡。新專輯首批出貨量喺全亞洲高達150萬張，打破晒佢前七張專輯嘅紀錄，孫燕姿重為新碟學現代舞，練到腳皮都甩埋，不過成績咁好都係值得嘅。
林嘉欣噚日喺助手陪同下出現赤鱲角機場，佢話要去東京做嘢，佢近日就唔小心病咗。林嘉欣日前公開同鄭伊健唱片御用監製陳光榮拍拖，問到男友陳光榮點解唔嚟送機？林嘉欣即時笑到甜絲絲，但就冇回答記者問題，之後就揮手入閘。
利孝和夫人噚日去銅鑼灣為陳細潔嘅雪肌蘭新店主持剪綵，記者提到無綫台慶「我最喜愛的女主角」一獎，佘詩曼話自己有八成把握奪獎，問利夫人心水人選，佢話：「唔講得，我都未投票，其實個個都好，重有咁耐，費事講錯啦。」利夫人又話有睇新劇《楚漢驕雄》，對秋官每逢有劇上股市便下跌嘅說法，佢話：「唔好咁迷信，呢次（個市）會起番㗎啦。」
內地演員王伯昭與張衞健及謝霆鋒嘅假戲真打事件擾攘多時，一直有報道指王伯昭喺呢幾日就會有所行動，向佢哋索償一百萬，但係噚日有內地報道指，王伯昭接受訪問時話索償一百萬呢個說法並唔係出自佢嘅口，佢重話雖然具體嘅金額重未諗到，但係就會將所得嘅賠償金，除去律師費等費用之後全部捐畀社會，佢話：「這件事情多少錢也無法挽回，但我覺得到最後還是要落實到錢上，不然這就毫無意義。」
