唔覺唔覺，星期日番鬼佬盂蘭節嗰日，就係有線十一周年台慶大日子，八方記得當年佢哋開台用微波傳送，吳天海喺伊利莎伯大廈天台爬水箱示範嘅情景，今日有六十萬訂戶，真係威到盡。前幾年台慶，有線試過送曲奇餅同埋糖多謝友好，今年就比較特別，送迷你有線外景採訪車仔一架（圖）。外事部啲大佬話，係寓意有線不論任何時候，都以第一時間送上最新最快新聞資訊、體育盛事、娛樂新聞云云。
講開有線，大家都讚真係做得唔錯，睇住佢哋不斷進步；但有一樣嘢唔好，就係唔照顧啲忠心舊客仔，有乜優惠都只係畀新客，舊客每個月畀緊300幾蚊月費，連魚蛋都冇粒，重要成日睇優惠新客廣告，你話唔心淡就假，唔知吳老闆會唔會變吓呢？
傳真︰2623-9278
電郵︰