曼聯、利物浦同皇家馬德里喺前晚進行嘅英聯賽盃同埋西班牙盃，雖然不約而同以後備兵上陣，但結果都係輕鬆過關。
曼聯向來鍾意用聯賽盃嚟練兵，今屆亦唔例外，前晚對克魯場波就派咗十一個後備落場；但睇番佢哋個陣容，好似布朗、基巴臣、沙夏同阿倫史密夫等球星都喺度，實力真係唔差，加上又打得好認真，卒之就輕鬆贏克魯三粒。類似嘅情況亦喺利物浦同皇馬身上出現，佢哋兩隊亦幾乎以全後備上陣，但都冇失拖，順利過關。
查實喺大球會踢得後備嘅球員，實力真係有番咁上下，如果可以喺一啲次要賽事打得好，分分鐘重可以上埋位㖭。好似幫曼聯入咗兩粒嘅阿倫史密夫咁，就有可能因雲佬嚟緊超聯要坐波監而打正選；而經已連續三場有波入嘅奧雲更加厲害，由毒草變寶藥，重搞到皇馬教練拉蒙頭都大埋，諗緊喺未來嘅賽事放佢落場拍魯爾同朗拿度，定係唔要魯爾同朗拿度是但一個。
德國國家隊教頭奇連士文，不嬲都勇於嘗試，除咗幫隊波改朝換代同引入美國式訓練方法外，重搵頂尖運動員幫手。早前佢走去搵「車神」舒密加，問要點先可成為世界第一。講真吖，𠵱家要贏一場波，球技固然重要，亦要有好強嘅心理質素，所以我求大俠都認同奇連士文咁做。
咪以為到NBA一定掘到金，好似啱啱俾帝王棄用嘅中國後衞劉煒，原來人工好鬼死奀，每個月只得一千五蚊美金（約一萬一千七百幾蚊港幣），結果去咗美國成個月只得嗰雞碎咁多嘅五千蚊美金，重衰過喺國內聯賽打波。之不過喺NBA學到嘅寶貴經驗始終有錢都買唔到。
自國際米蘭辭退古柏後，雙方合約本來仍到出年六月，不過國米日前正式同古柏傾掂數「分手」，呢段欲斷難斷嘅關係終結束。站在古柏立場，家陣市場上有唔少空缺，包括馬略卡同埋費倫，𠵱家無約一身輕自然可投向心頭好懷抱；至於國米唔使再白支人工，都算「雙贏」局。
老一輩球迷無人會唔識蘇古迪斯，呢位一代名將會再披黃色戰衣作賽——當然唔係巴西，而係英格蘭非聯賽球隊加科夫城。話說間球會嘅老細喺南美洲開足球學校，所以可以靠關係請得郁呢位五十歲老人家出山玩吓。蘇古迪斯將會同前曼聯球星沙柏並肩作戰，有睇頭。