網友大鬧搭上蠢貨
Paris累菲臘退出網球賽

富家女ParisHilton上星期自爆同澳洲網球手菲臘普西斯（MarkPhilippoussis）拍拖，重周圍唱菲臘已經飛起好悶嘅澳洲女歌手DeltaGoodrem，搞到全澳洲嘅人都戥Delta唔抵，菲臘同Paris重成為澳洲師奶嘅公敵。不過Paris換畫如換衫，近日又傳佢搭上美國網球手盧迪克（AndyRoddick）。

被罵狗男女
自從菲臘同Paris嘅戀情公開後，唔少人去到菲臘嘅網頁度話佢哋係「狗男女」，網主惟有刪除晒所有鬧菲臘嘅評語。好多人都唔明點解菲臘要飛起深得全澳洲愛戴嘅抗癌鬥士Delta，揀個拍過春宮帶嘅Paris。有人重話：「點解菲臘要飛起又可愛又靚嘅Delta？Paris呢件蠢貨，絕對稱唔上突出！」
傳聞指菲臘因為頂唔順輿論壓力，近日宣布退出喺瑞典舉行嘅網球賽，有記者走去訪問菲臘阿媽，但伯母就力撐乖仔，話會尊重佢嘅決定。而據聞Delta俾菲臘喺電話度飛，𠵱家傷心到極，佢阿媽即時飛去倫敦安慰佢。

搭上盧迪克
Paris雖然俾人鬧，但佢一樣少理，好似前兩日，又有人見到佢同美國網球手盧迪克喺賭城拉斯維加斯一間夜店度互咀。而喺上星期五，Paris同阿妹Nicky出街，有人見到Paris講電話時不停咁喊，不過之後又笑笑口擺甫士影相，認真神化。