是日港股，講得上係和風細雨，恒指高低波幅得57點，一般大藍籌輪價升跌幅度未致殺死人。
恒指C輪：短期大市，有望成功考驗12800（以收市指數計）後，造番好些少，除非外圍又試散過。可以諗吓搵啲恒指C輪短炒，向4442埋手。4442明年3月到期，輪價13仙，溢價5.5%，槓桿率23倍（有效10.8倍），引伸波幅20.4%。想畀少啲溢價，則揀稍為近期嘅9911，相關數據在走勢圖內。𠵱家炒恒指C輪，唔適宜博得太盡，亦唔適宜期望有太高回報，適宜密食當三番，可能當兩番。
平保C輪：3隻國內保險股都有進帳，平保（2318）算係升幅最大嘅，收11.55元，升15仙。平保C輪2233收1.47元，升11仙。吼住平保反覆嗰陣，間中回落之時，執2233，明年2月到期，溢價3.6%，槓桿率7.9倍（有效5.7倍），引伸波幅34.1%。正股隨時上落20、30仙，隻輪升跌10-15%閒過立秋。
汽車股C輪：國內汽車股郁郁吓，華晨（1114）收1.69元，升4.3%。華晨C輪2112收2.4仙，升33%，成交金額15萬咁大把，年底到期，行使價2.50元，望正股上到呢個價，非常不切實際，隻輪最後命運如何可以想到，九成九九用嚟墊煲底。另1隻C輪2101按盤價2.6仙，嘜高30%，雖然明年2月至到期，但溢價60%，最後亦係飲雪水嗰隻。
駿威（203）收2.675元，升3.9%，C輪2289收29.5仙，升18%，明年3月到期，溢價18%，槓桿率9.1倍（有效4.5倍），引伸波幅56.3%，屬於貴嘢，買唔過。
章盛