日韓興啲乜：<br>車房變大牌檔明星飯堂撞韓星

韓國明星飯堂主要集中在漢城狎鷗亭洞與清潭洞一帶，由貴價日本菜、韓式食堂到地道大牌檔都有，數最出名的，是日間車房夜晚變身大牌檔的壞男人TentBar，韓星座上客多不勝數，全智賢、金來元、Kangta、李孝利、權相佑、車太鉉、宋承憲全部留低過腳毛，有心撞韓星攞簽名，夾啱時間霸定位喇！

記者：張穎麟　攝影：陳盛臣

■去大牌檔，話唔定撞到我哋！

豪飲大牌檔
狎鷗亭洞好流行TentBar，這類韓式大牌檔白晝是車房、停車場，夜晚搭個帳篷就變身大牌檔，地盡其用。入夜的壞男人TentBar勁好氣氛，天花掛滿200多幅韓星、運動員、政客的簽名合照，氣勢比香港的所謂星級食肆勁得多。韓國男女愛在大牌檔飲酒，韓星亦一樣，到得TentBar就會開懷暢飲，撞星指數No.1，店員韓敬文解釋：「明星凌晨兩三點拍完劇，就會同大班工作人員一齊嚟，由於附近係高尚住宅區，客人比較斯文，班明星可以享受自己空間，全智賢、宋承憲、金來元都嚟過，佢哋日頭重會攞部車嚟整㖭！」

壞男人TentBar
電話：（82）2-5408225
地址：漢城江南區清潭洞40番地
交通：地鐵7號線江南區廳站，轉的士約2,000韓圜（約$15）。

蜜燒雞肫佐酒一流
招牌菜，洋葱、大葱、芝麻等配料惹食慾，雞肫燒得勁腍，佐酒一流，18,000韓圜。

甜不辣鍋金來元話正
內有魚蛋、獅子狗卷、金菇、草菇，湯味鮮甜，金來元一個人食得晒一煲，15,000韓圜。

真露燒酒韓人必飲
韓國人十個有九個飲真露燒酒，酒精含量22度，唔好睇小，《我的野蠻女友》中，全智賢的爸爸飲2杯真露，即醉！

氣派日本菜
韓國近年追捧日本菜，地利關係，鄰近韓國SMEntertainment製作公司的Izakaya也是明星飯堂之一，旗下藝人Kangta每回公司必到、BoA每回韓國必幫襯。店舖有落地玻璃加獨立車房，座位寬敞門面有氣派，加上獨創的日式壽司、天婦羅，難怪舖內充斥明星相、簽名海報，連裴勇俊、S.E.S.的Eugene、組合jtL、李孝利等都捧場。

■韓星貪靜多數揀閣樓坐，自己識揀位喇。

■簽名海報多的是，jtL簽名海報只可貼在洗手間門口。

■韓星簽名照列陣，Eugene駕臨，本身是S.E.S.歌迷的Izakaya老闆即場與她合照。