05年未到，新款記事簿已出得七七八八。基本上，記事簿可分為補充式、傳統釘裝款式，又或是薄身便攜式。當中以Playboy記事簿最引人注目，亦至受潮友歡迎；另外長期受歡迎的卡通及動畫角色亦有齊。新一年新開始，當然要買本最啱自己的記事簿，來年繼續衝刺！
記者：黃婉冰 攝影：伍慶泉、蔡鴻雯
ImageGirl：Vicky
以傳統釘裝設計的記事簿，由封面到內頁又靚又實用，除一般必有的日、月、年程、通訊錄外，有些更附上有用、得意的資料如常用網址、長途電話應撥區號、HealthCheck、日本地鐵路線圖、東京地圖等，點止係記事簿咁簡單！
由十多張復刻Playboy靚女相拼湊成的封面，夠晒煞食。裏面一樣有睇頭，日曆、年、月、日程表、通訊等，每部份都以靚相相隔，張張都充滿懷舊味，最受潮流人士歡迎。
售價：$95（a）
封面咁多個迪士尼人物你又識得幾多？內頁每版都有一個卡通角色，頁頁不同，揭到最尾數頁，重會依名稱列出迪士尼誕生以來出現過的卡通人物同角色，儼如一本迪士尼百科全書。
售價：$155（a）
外形似筆盒的HelloKitty記事簿，內裏分為WeeklySchedule、通訊錄同Memo。每頁後面都印有不同的Kitty圖畫和月曆，唔帶出街又可放在枱面變成座枱日曆，一「本」兩用。
售價：$68（b）
鍾意宮崎駿動畫的女Fans，又點可以錯過這本印有樂譜的鮮紅記事簿。今次由黑貓吉吉做主角，重化身成不同音符出現在五線譜上，封面咁靚，又點忍手唔買？
售價：$115（b）
帶有懷舊味的冬菇記事簿，特點是內附多種不同的資料供參考，如常用網址、HealthCheck、長途電話區域號碼等，資料豐富，但全為日文，唔識睇都係無用！
售價：$145（d）
你係宮崎駿Fans，又係《天空之城》狂迷？這本封面印有一大個天空兵的記事簿，又會否引起你的興趣？封套以麻布做成，款式唔會幼稚，男仔用都唔怕俾人笑。
售價：$115（b）
法國高竇貓FrenchKitty，硬皮封面唔怕用幾用就殘。封面以巴黎作背景，內頁則全以粉色為主，非常女性化，再送埋貼紙畀你記低重要日子，夠晒體貼！
售價：$65（a）
記得小仙女每次出現，身邊四周都會出現閃閃亮光，記事簿的封面亦用上閃令令幻彩色。內頁一樣精采，頁頁顏色豐富又有公仔，同時附有東京路線圖、時間表、靚靚貼紙等。
售價：$72（b）
全本粉紅色、封面軟綿綿，再加埋個搞鬼笑容，一睇就知又係粉紅佳人BARBAPAPA。記事簿每頁都印有其他家庭成員，最後一頁可填寫個人資料。
售價：$115（a）
HelloKitty唔一定又紅又綠，這本仿皮珍珠粉紅色記事簿，以HelloKitty頭及英文字母造成壓花效果，高貴唔再花喱碌，月曆、Memo紙、日程表齊備。
售價：$48（b）
仿皮封面壓上金色史力奇公仔圖案，內頁除備有日程表、月曆及Memo紙外，將後面的通訊錄取出，又可以變成一本獨立電話簿，夠晒方便。
售價：$72（b）
貴人事忙，日日有幾百樣嘢要做，一本記事簿話咁快就寫晒。如果係咁，買本可加頁數的款式會更為適合，唔夠用可自己再加內頁外，重可以自行加配其他有用配件如專用間尺、拉鏈雜物袋、地圖等。用完一年，換過新的內頁又可再繼續使用，合乎經濟原則。
Playboy記事簿，全黑絨套襯銀色嘜頭，低調有型格。打開記事簿，每Part都有不同的Playboy封面女郎舊相片，夠晒悅目。
售價：$320（a）
這本以小熊維尼笑臉做封面的記事簿，以軟綿綿毛毛做簿套，彩色內頁有晒維尼同跳跳虎等公仔，重有相套畀你放番張個人靚相。
售價：$185（d）
四葉草咁受歡迎，連記事簿都用佢嚟做封面。麻布做的簿套上更有個小相套，可以畀你放張沙龍照，內頁更有拉鏈袋可放卡片或學生證。
售價：$115（a）
記事簿封面有個印有可愛熊的袋仔，揭到最後重有一塊小鏡，去到邊照到邊，貪靚鬼啱晒，另有多個層格可放信用卡及八達通。
售價：$128（d）
日本大眼妹水深阿土，一大把秀髮加上性感造型，女仔實鍾意。內頁附有不同款式的Memo紙，寫完可沿虛線撕下，方便快捷。
售價：$115（a）
全黑色夠沉實，封面有個鑄有阿童木公仔的金色牌，唔似其他公仔款咁孩子氣。除日、月程表外，最後一頁更可用來貼貼紙相。
售價：$30（f）
書包鬼咁重，重要加多本大記事簿，認真百上加斤，何不買本又薄又細的記事簿？雖然簿仔細細，但基本的年、月、日程表統統俱備，細細本容易放入手袋或書包，帶出街夠晒輕便。
潮牌CernoldPalmer，記事簿Size足有一本功課簿咁大，所以即使頁數不多，依然有晒大大格日程表、月曆、Memo紙等基本內容，重有埋筆套插筆，照顧周到。
售價：$52（b）
Sanrio這系列的記事簿，簿內同時附有中國年曆同香港假期，當然重有月曆、電話簿、Memo紙等，細細本內容都算豐富齊全。
售價：每本$29.9（e）
全本畫滿得意貓仔，絕對是貓癡的首選。記事簿同時備有支出一覽表、CheckList等供使用，最特別係有埋開運魔法、提高運勢小魔法、生活小智囊等得意資料。
售價：$19.9（c）
店舖資料
（a）ViViShop 旺角潮流特區122號舖 21368178
（b）CherryShop 彌敦道760號聯合廣場M層15A舖 27872161
（c）吉之島 28846888
（d）city'super 銅鑼灣時代廣場B1地庫 25062888
（e）SanrioVivitix 銅鑼灣景隆街3號B舖 21561202
（f）Sogo 銅鑼灣軒尼詩道555號 28338338