十多個鐘車程，若然內櫳唔夠豪華舒適，定必坐到腰骨硬晒腳都痹埋；面對崎嶇山路，如果引擎稍弱轉向唔靈活，不眠不休都未必去到目的地；上坡落氹涉水過河，OffRoad性能配套差少少，架車都會入水刮底兼翻車。但係今次由合泰汽車搞嘅900公里北上桂林OffRoad之旅，腰唔太硬腳唔算痹，落完水爬完山坡人車都可以全身而退。原來親身感受福士Touareg長途越野旅程後，先知呢部車確係大鐵人！
記者、攝影：馬慶武
今次福士搞呢個「桂林遊」，除咗有得食有得玩有得做善事，重可以一嘗真正長途駕駛滋味，戲肉當然係去荒山野嶺體驗Touareg嘅OffRoad性能啦！
11架Touareg由香港揸車上桂林，差不多要行足900公里，途經崎嶇山路、擠擁鬧市，要成十幾個鐘頭車程。駕駛者輪流交替，在大部份雙線雙程路段，前路不斷出現大貨車，不斷重複啪低一個波加速抽頭嘅動作，駕駛者可真正體驗到Tiptronic加減波及241匹（3.2版）最大馬力輸出帶嚟嘅利落同勁力。長途車乘客自然變得特別奄尖，獨立調校冷氣值得一讚，空間亦算寬敞，只係後座椅背較直，長期坐住會唔舒服，不過整體舒適程度依然喺水準之上，最少筆者喺不斷自我提醒唔好瞓着嘅同時，亦不經不覺瞓咗三個鐘！
到埗之後，被邀請擔當顧問嘅越野四驅專家馬大立已經率先視察過場地環境，定出路線，而團友們遊覽完甲天下嘅山水之後，喺第三日下午正式投入OffRoad之旅。
行經大段山路到達市郊，第一件事就係調校Touareg嘅CDC空氣懸掛系統，㩒一個掣就將車身離地由最低嘅160mm升高至300mm，應付頭段充滿起伏小丘嘅草地綽綽有餘。一輪爬高爬低熱身之後，開始極具快感嘅過河路段，衝入一米深嘅河道，正當筆者睇緊架車有無入水嘅同時，ASR、EDL已介入應付河底超滑嘅碎石。以極輕鬆嘅姿態橫渡河流，當然，車外水花四濺，車內卻無出現任何滲水情況。
最後測試埋Touareg車身傾側最大角度，廠方公布為35度，但據估計當日全車側斜足有40度，車身都重好穩陣。望望傾斜車廂裏頭嘅車主，除咗玩得盡興，重笑騎騎沾沾自喜，一吐烏氣咁款：「OffRoad性能喺香港無乜用？但經過今次，抵晒啦！」
「之前都驚玩完返香港要大修，不過經過咁激烈嘅OffRoad考驗之後，檢查過架車都無損無爛，返去洗吓就得啦！……車價有番咁上下，果然靠得住！」
「第一次玩OffRoad，好刺激，買車嗰陣都係貪佢坐得舒服樣又靚，從來無諗過佢有咁強嘅OffRoad能力。」
「之前我都未試過揸Touareg玩OffRoad，真係好掂，而且自己落手揸咗十幾個鐘之後，更加發現Touareg行車的確好穩定，力量充沛，重好慳油！」
查詢VolkswagenTouareg資料，可致電：28828938（合泰汽車）
