雖然大市方向未明，但噚日有好多股仔炒到飛起，例如供股認購不足之後炒到㷫烚烚的大慶石化（362）就勁升19.48％，收0.46元。
至於獲金手指入股的進智公共交通（077）亦勁升20.69％，收1.40元。睇嚟金手指可以與秋官一較高下。
經紀陳向小初大讚中國燃氣（384）勁抽，佢話上周已有傳聞，話隻股會在本周一停牌，引入大隻佬做策略性股東，結果中國燃氣真係在周一停牌，惹來市場無限憧憬。
不過噚日復牌開出嚟，唔係發新股引入新股東，而係投資新項目，炒家失望之餘沽貨鬆人，令股價急跌，但最後竟然能倒升，反映幕後大戶有心有力，功架非凡。經紀陳話，中國燃氣故事應未就此完結，分分鐘重有下集。
中國燃氣昨日一度低見0.84元，收0.94元，升4.44％，成交股數1.28億股，金額1.14億元，單睇成交咁大就知唔講得笑。
另外，金勞詹擔大旗的駿雷國際（070），噚日亦冇厘頭急升20％，收1.8仙。但經紀陳就叫小初慳番啖氣，佢聽聞係以前嘅炒家揸住貨尾，因心情靚出嚟露兩手。
慕容小初