意大利大師打造新形象
李嘉欣非洲幻化蛇美人

李嘉欣擔任名表的形象大使，日前到了非洲摩洛哥拍攝宣傳照，由意大利化妝師設計新形象。攝影師要求李嘉欣擺S形甫士拍照，難度雖高，但她都盡量配合。

李嘉欣最近應積家表Jaeger-leCoultre邀請，擔任形象大使，日前到了非洲摩洛哥為女裝鑽石腕表系列idEALE拍攝一輯宣傳照片。
廣告商聘請了意大利的化妝師和髮型師為李嘉欣炮製造型，她說：「佢哋同我化妝，只係打咗綠色眼影，連假眼睫毛都冇黐上去，唇膏顏色又好淡，同我平時嘅化妝方法好唔同，所以最初都好擔心個樣出嚟唔知靚唔靚，但結果影出嚟好特別，完全係另一樣感覺，我真係好鍾意。」

歸功攝影師
李嘉欣又很欣賞一班工作人員的工作態度，她說：「佢哋好錫演員，隨時幫我打傘同畀水我飲，照顧周到，工作敬業樂業，佢哋為咗影得靚啲，重拎咗六、七箱鞋畀我配襯。」
問李嘉欣這次拍攝有甚麼難忘，她想了想說：「攝影師要求我擺出S形動作，同埋喺天台躺卧擺甫士，最初我都覺得好難，好在攝影師擅長捕捉女性體態美，影出嚟嘅效果真係好靚，環境氣氛亦好夾。」

愛上摩洛哥
首次到摩洛哥的李嘉欣對當地留下非常深刻的印象，她笑說：「當地人好友善，建築物又有特色，呢次我哋拍嘢嘅地方，重係一位歐洲名人嘅度假別墅，間屋好有獨特嘅風格，我周圍參觀時，差啲唔捨得走㖭。」不過嘉欣卻嫌當地陽光太猛，有時拍照，眼部很辛苦。