長實本月高價投得何文田地王，估唔到帶挈埋附近窩打老道八號（窩八）業主。
窩八早排險些淪為「英雄塚」，因為何文田地皮有價，即刻升值。一眾乘今年三月樓市大升浪，買入該盤單位嘅業主，𠵱家竟然有幸賺錢離場，算係執番身彩。
例如二座五百幾呎中層C單位，業主三月以二百餘萬買入，一度「坐艇」。上月該盤臨近入伙，有二百幾個二手單位放盤，但買家寥寥可數，業主徘徊蝕讓邊緣。
幸而賣地後氣氛大好，近日遇上投資者，以二百二十八萬接貨，每呎三千九，唔使蝕，重有微利。
山頂創世紀歷史悠久，業主個個身份顯赫，○一年由世茂中國以兩億三買入，特別保留咗「股壇怪傑」香植球住過嘅主樓「玻璃屋」，只喺側邊起咗兩幢獨立屋，命名施勳道21號。
無敵海景一向係山頂豪宅最大賣點，世茂中國地產部經理黃志偉話，獨立屋嘅建築設計，令到花園、泳池、車房、廳房，全部都可以望到海景，每幢洋房重特設私家觀光𨋢，住客就連上上落落，都可以望到海景。
蘭西記得，深水灣香島道33號都有私家𨋢，不過，同時集觀光用途於一身嘅私家𨋢，呎個盤都係第一次。施勳道21號絕對唔會嘥咗個靚景。
繼西灣河嘉亨灣之後，港島另一大型住宅新盤，西環堅尼地城泓都（圖三右面三幢），剛剛公布十二月登場，入場費百八萬。代理已經做工夫，甚至收定票先。
香港置業董事翁祥生話，該公司一共接獲逾八百個查詢，收到認購票七十張，其中保險界高層，重大手入票二十張，諗住買十五個做投資，主要係兩房及三房單位。
呢個盤能夠吸引唔少買家興趣，原因係港島未來冇乜同類供應。
世邦魏理仕發表研究報告話，豪宅買家，一般願意付出較高價錢，買入罕有嘅心頭好頂層或複式，因為呢類單位夠大、私隱度高、予人地位超然感覺。
該行歸納近年出售嘅豪宅成交價，發現複式或頂層，造價較一般分層高三成七以上。
差別最大嘅，竟然係早輪熱賣新盤西灣河嘉亨灣，複式每呎一萬二千五，較分層六千五貴九成二。呢個豪宅包裝嘅屋苑，複式呎價較坐落傳統豪宅區嘅何文田君頤峰重要貴，難怪引發新一輪起豪宅潮。
整體樓價尚未回到九七，但麵粉貴過麵包嘅風氣，原來已經席捲至偏遠嘅新界。
廖姓投資者委託韋堅信，標售新界古洞坑頭路低密度住宅地皮。幅地約六萬呎，批建九幢二千七呎別墅，總樓面兩萬四千幾呎。
業主意向價八千五百萬，樓面地價每呎三千五，較附近村屋價重要高得多。連埋建築成本，估計將來要賣超過五千蚊一呎，一座別墅要千三萬。
若然幅地喺十二月二號截標後，成功以呢個價賣出，手持大量新界農地、同政府傾緊補地價嘅發展商，相信有排煩，因為完全再冇討價還價餘地。
電郵地址：