DVD錄影機價錢落完又落，好多人都心思思想話整番部，搞到DVD錄影機聲勢一時無兩，但係一時又「+」、一時又「-」，大家真係睇到眼都花！
其實現時大多數的日、韓牌子機，如SONY、PIONEER、SAMSUNG、LG等，錄影制式多數行DVD-R/RW；至於國產機方面，由於暫時只有Philips肯賣出DVD+R/RW技術，所以國產機就差唔多行晒DVD+/RW。可能大家會問，咁即係買邊種好呀？
其實簡單講，邊種制式都已經冇問題！因為時下出的DVD機或DVD錄影機，都基本對應閱讀+/-制式，即係不論是DVD+R/RW或-R/RW所燒錄出嚟嘅影碟，放入新出嘅DVD機就播到，不過唯一考慮係+R/RW碟就賣貴啲，相對-R/RW就平幾蚊囉！
文：燒碟王
講開DVD錄影機，又不得不提今個星期AV場新返咗部國產DVD+R/RW錄影機；牌子名叫「金正」，名不經傳，錄影質素都屬一般，中規中矩，不過價錢好嚇人，新機落地價$1,080，只有旺角花園街「華記」做緊，係現時最平嘅DVD錄影機；有咗佢做新指標價，我諗國產DVD錄影機價錢，又有一輪鬥生鬥死咯！
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。
