十月九日，本欄講述讀者梁先生送兒子往澳洲昆士蘭大學讀電機工程，今年讀完三年班，但因為身為「非澳洲居民或公民」，攞唔到暑期實習，於是進退兩難，梁先生話花咗數十萬元送個仔去澳洲讀書，十分唔抵。《留學澳洲工科中招》一文刊出後，已有其他讀者來電郵提供意見，可參看十月二十一日本欄講《澳洲工科生要識轉彎》。
放完重陽假期，收到《蘋果》轉嚟嘅公關公司電郵，公關公司叫做Golin/HarrisForrest。一位副董事KennesYoung解釋佢哋代表TheUniversityofQueensland（昆士蘭大學）已經知道呢件事，並且喺十月十九日發咗一段新聞稿澄清其事。新聞稿話：「昆士蘭大學向國際工程學學生承諾（assured），學生在澳洲或在自己國家進行為期六十天的專業實習，以考取學士學位的安排將不會遇到任何阻礙。昆士蘭大學工程學、物理學及建築學行政主任MichaelKeniger教授表示，有關傳媒指昆士蘭大學其中一名學生因不是澳洲公民而未能在澳洲工作的報道不正確，予以澄清。」
「學生簽證允許所有國際學生在每學期每周工作二十小時，而學生放假期間將獲得更長的工作時間，國際學生在澳洲工作不存在任何阻礙。」
既然如此，讀者梁先生如果仍然為兒子讀書前途煩惱嘅話，請直接與呢位MichaelKeniger教授聯絡，或者打電話去Golin/HarrisForrest公關公司搵KennesYoung對話，呢間係大型國際公關公司，講說話會負責任嘅，公司電話：25017987。大家講到掂，就唔使左丁山呢個中間人轉述，避免誤會啦。