羅馬後衞彭路基呢匹「野馬」早排得罪新帥迪尼利，響羅馬唔慌有前途，佢冇嘢好，好在當年跟着個好「大佬」卡比路，聽講祖雲達斯有意搵歷高達利交換佢，唔怪得佢最近夠膽同迪尼利過唔去。話時話，歷高達利又係迪尼利昔日愛將，講到尾，又係自己人「圍威喂」。
話說迪尼利早幾日以彭路基紀律差為理由，禮拜日對巴勒莫甚至冇將彭路基列入參賽名單，明日作客祖雲達斯怕且都唔慌有份踢。
當大家諗彭路基因咩事咁沙膽，有消息指原來卡比路已經諗住冬天轉會市場一開，就搵彭路基加盟。佢兩個由AC米蘭、皇家馬德里到羅馬一直共事，睇怕呢匹野馬嘅事業，又可以得到恩師出手挽救。
本來羅馬不嬲同祖記勢不兩立，不過迪尼利執教基爾禾時最重用歷高達利，如果呢宗交換成事，真係一家便宜兩家着，成事機會真係唔低。
意大利下月十七號主場對芬蘭場國際友賽，鐵定喺西西里嘅墨西拿施利斯迪球場上演，呢個安排好明顯係墨西拿升班後表現好、球迷夠狂熱嘅獎賞。上個月意軍對挪威喺巴勒莫踢，聽講氣氛好好，意足總食髓知味，無非想再搞㷫個party啫，有新意之餘證明墨西拿季初真係威水。
禮拜日幫樸茨茅夫射入靚波嘅塞內加爾前鋒D卡馬拉，突成身份未明人物，領隊哈利列納賽後就話，唔知球會當日喺摩德納買斷定係借佢番嚟！終於樸隊主席文達歷出嚟澄清，當日D卡馬拉同另一非洲球員美沙基一齊加盟，後者借番嚟，D卡馬拉係買斷嘅，咁哈利列納安樂啦。
可望於下月十四日傷癒復出嘅英格蘭同皇馬中場碧咸，日前接受中國某網站訪問。當被問知唔知老婆維多莉亞喺上海，同埋會唔會再去中國比賽，佢答得鬼咁行，淨答「知」同「或者」，搵句完整句子都冇。碧咸喺國內好紅，但如想進一步鞏固自己嘅位置，就攞啲誠意出嚟。
噚日喺騎士贏塞爾特人嗰場NBA熱身賽火藥味十足，塞軍老將皮亞斯唔單止同騎士上季新秀狀元勒邦占士用手肘互撞，大家一齊領技犯，皮亞斯更向騎士後備席吐口水。聽講自上季兩隊進行咗域奇戴維斯單轉會交易之後，雙方開始唔多妥，睇怕兩隊打常規賽嗰陣更加火爆！