張衞健、容祖兒、吳君如同Twins等主演嘅劇集《功夫足球》，有傳因為吳君如參加過7.1大遊行，而令劇集被內地封殺，但馮仁昭聽聞有力人士一直為《功》劇周旋解封，結果皇天不負有心人，搞咗半年，套劇下月開始喺內地電視台播映，無綫就暫定十二月出街。
《功》劇係由寰宇同M8共同投資製作，不過劇集喺解禁前夕，有消息指M8將劇集嘅股份賣晒畀寰宇。之前有報道話M8財困，重一度拖欠員工薪金，旗下藝人林保怡會簽番無綫、許志安又搵緊新經理人、張衞健亦計劃喺明年約滿後鬆人，所以今次M8將股份變賣，相信又會惹嚟敏感猜測。
噚日寰宇老闆娘林太喺電話度話：「套劇確係過晒關，會喺下個月陸續喺全中國各地電視台嘅黃金時間播出。」問到M8係咪因為水喉乾涸而賣股？林太就支吾以對，唔肯正面作答。
製作人蕭定一就話劇集遲出街係因為要做大量特技，套劇題材健康，唔使點刪剪，吳君如嘅戲份亦都冇剪過㖭。
鄭少秋台慶夜會同一班花旦表演歌舞，豔福無邊，各人將特製發出砵砵聲嘅樂器夾喺身上，然後互揑對方嘅樂器，發出唔同音調。秋官套新劇《楚漢驕雄》啱啱播映，佢話：「收視有望四十點㗎！《金枝慾孽》就女人鍾意睇，呢套就有趣味同學術性。」
幸福少奶奶翁嘉穗同張瑪莉前晚去中環出席澳洲地產公司嘅活動，翁嘉穗話囝囝Jason已經四歲，讀緊幼稚園，喺班中成績重係頭三名㖭，令佢好安慰。
翁嘉穗話同老公有共識，起碼要等個仔十四、五歲先會送佢去外國留學，佢話：「我老公話香港啲學校好好，而且細細個就送個仔去外國，實在太殘忍嘞！」
早前俾記者拍到喺上海同熱女郎表現親密嘅李萬祺，前晚喺君悅酒店出席晚宴時話：「單身漢有異性喺身邊好正常啫，我成日都攬女仔㗎啦。嗰個係我朋友嘅朋友，絕對唔係女友，我暫時冇考慮發展長遠男女關係。」
甜姐樂基兒噚日去太古廣場西武百貨為牛仔褲品牌行騷，佢話自己係不折不扣嘅牛仔褲迷，佢話：「我見到啱心水嘅牛仔褲就會買，重會着到爛無可爛先至掉。𠵱家珍藏嘅牛仔褲都有十幾二十條，而我最鍾意就係去泰國嘅二手市場入貨。」
