「秋官效應」真係邪到你唔信，噚日再度發揮威力，加埋油價創新高以及上周五美股大跌，恒指一度失守12800大關，低見12743，連亞太區股市都齊齊跌，好彩午後有資金流入，加上憧憬美元加息步伐會減慢，減低市場對加息的憂慮，令恒指重上12800收市，收報12818，跌幅收窄至197點。
不過老行尊就話，睇個勢大市好大機會要試試250日線牛熊分界線（現時在12603）才完成調整。老友們又重彈舊調話；「不如夾錢畀秋官退休算啦。」
嘉里建設（683）則無懼秋官與油魔，一度勁升6.5%，升上16.30元，其後升幅收窄至3%，收15.30元。黑客話此股好似有少少被人刻意推高的迹象，唔知會唔會同批股或發可換股債券集資有關。嘉里就算唔需要高價投地，亦需要資金大搞物流及基建業務，發動抽水機一啲唔出奇。
信置（083）在配售可換股債券抽水前，股價亦被推高，兼有大行唱好，完事後則被唱淡及拋售，所以大家對一些逆市被推高的股份要格外小心，自問跳車技術一般就無謂跟炒。
和黃（013）分拆完2G業務上市套現70億元後，最近重話連意大利3G都要分拆上市，消息不旦未為和黃帶來刺激作用，反而令市場擔心和黃「求財若渴」，連一些發展未成熟的業務都要拆出來賣。和黃跌2.11%至57.75元。
勝獅（716）在10月19日曾配股抽水，但聯交所資料顯示，在同一日金手指惠理基金於勝獅的持股量由0%變成5.1%，相當於2664.6萬股，奇怪的是勝獅復牌至今，股價並未大幅炒上。
阿虎