過去十二年來，每逢有鄭少秋主演的劇集播映，股巿必然下跌。昨晚由秋官主演的無綫劇集《楚漢驕雄》首播，湊巧昨日恒生指數亦下跌了一百九十七點，秋官表示當恒指累積下跌三百點後，他便會趁低入巿。
由鄭少秋、江華和張可頤主演的無綫台慶劇《楚漢驕雄》昨晚首播，自九二年秋官在劇集《大時代》中扮演股巿大鱷丁蟹一角起，此後每逢有他主演的新劇播出，股巿必有下調現象，甚至出現大幅下瀉，被稱為「丁蟹效應」。昨日秋官新劇推出第一天，恒生指數共跌一百九十七點，早已預言股市必定會跌的秋官有見「丁蟹效應」再次應驗，即表示會考慮趁低入巿，大賺一筆。
昨日恒指開巿報一萬三千零一十五點，收巿則是一萬二千八百一十八點，下跌了一百九十七點。秋官表示自己亦有留意股巿波動情況，他昨日在電話中說：「我唔介意『丁蟹效應』㗎，因為近年次次都應驗，股民就可以捉到條路，咁佢哋就知道點做，呢條咪係財路，我就係佢哋嘅『明燈』，佢哋發大達，多謝我都嚟唔切，根本係唔應該鬧我㖭！」
而在秋官劇集播映期間股巿跌幅最大的，當數九七年播映的《江湖奇俠傳》，當時恒指共跌了五千三百二十四點；跌幅最小的則是九六年播映的《新上海灘》，恒指共下跌三百點。
其實無綫日前宣布《楚》劇即將推出時，股巿已有下調趨勢，日前在記者會上預言股市必跌的秋官，近日亦十分留意股巿，問到他既然深信「丁蟹效應」，是否已準備趁低吸納？秋官說：「梗係入啦，我要乘機賺番筆，大約等恒指累積跌到三百點，我就會開始入貨。我會拎幾萬蚊出嚟入貨，希望可以賺個double（雙倍）。我認為做人唔可以咁大貪，否則會貪字變個貧。」
問到秋官會買入甚麼股票時，他說：「我會選擇買藍籌，因為穩陣啲，所以呢幾日都會留意多啲個巿，恒指再多跌百幾點，我就有行動㗎啦。」問秋官預計三十集《楚》劇播映期間股巿會累積下跌多少點？他說：「幾多點真係幾難估。」
秋官又透露身邊有朋友不相信「丁蟹效應」，他說：「佢唔信邪，因為話我累佢輸錢，佢每次見都話要鍊死我，所以我就『潤』番佢，話鬼叫你唔信我咩，佢好應該撼頭埋牆。」不過秋官最後再三提醒股民，「丁蟹效應」只可以作為參考，千萬不可盡信。
而《楚》劇演員江華昨日在電話中則說：「我都有買股票，但嗰隻藍籌股係以前買落，今日股市只係跌咗少少啫，唔關秋官事嘅。」
此外，林文龍和佘詩曼昨日分別在將軍澳電視廣播城出席宣傳活動，談到「丁蟹效應」時，文龍說：「真係唔到你唔信，好在我買嘅係長線股，下次見到秋官真係甘拜下風。」
而阿佘則說：「我冇買股票㗎，因為幾年前試過蝕二十幾萬，知自己承受唔到呢個打擊，有錢會儲起穩陣啲。」
採訪：比華利、卓寶花
