何文田地王賣價九十四億，下任特首大熱門之一嘅唐唐，當堂面色紅潤，攝住檔位直上。太子章亦不甘後人，乘勢推出大學三改四，說三道四之間，亦成功獲得曝光攞分。至於煲呔，就棍打「小長毛」張超雄嘅公投動議，話公投唔實際，同中方擋槍彈，為國家亦立一功。
唐唐狀態回勇，有九十四億打底，問鼎下屆，梗係本錢最厚。佢接受有線訪問，話○八、○九嘅滅赤計劃不變，又否認地產有泡沫，話現時樓價大起，只限於豪宅，無謂再抽豪宅稅嘞咁講。
○八年度滅赤目標，當然毋須變。因為阿董呢一屆政府，只係做到○七。唐唐身為財司，任期至○七年六月，佢亦功成身退，可以拍拍籮柚行人。若然唐唐○七年接任特首，咁佢更加唔使再做財政司司長，呢個位另外有人頂上，○八滅唔滅到赤，亦係到時新財政司司長嘅責任，所以唐唐唔怕開定期票，因為無論開大開細，佢都冇衰！
至於樓市有冇泡沫？現時豪宅水位經已過萬銀一呎，由於大陸佬暴發戶瘋狂掃貨，專搶山頂同南區。明年中方開放埋「企業自由行」，大陸佬挾熱錢南來掃豪宅，勢頭更加瘋狂，除非胡溫發火，反貪反腐，再拉幾個周正毅返去，重要打靶立威，咁到時豪宅炒風先至會有望平息少少，否則，明年豪宅見三萬元一呎一啲唔出奇，直至○八年北京奧運完結，全國總爆煲為止。所以有快水就好趁快「骨」，○五年將會係最後一波嘅泡沫癲狂迴光反照期！
不過都係益豪宅唧！着到一支人肉紅蠋嘅李小琳嗰一級嘅大陸富豪，唔通會去將軍澳掃貨咩。早幾年，董團夥猛咁謾罵泡沫經濟係肥彭遺留嘅地雷，講耶穌一味叫港人「腳踏實地」。睇嚟地產泡沫呢隻海洛英，特區都係冇可能戒得甩，斷咗幾年，搞到特區口水鼻涕齊流，六百萬人同董團夥一樣痛苦打滾，磨床典席，𠵱家好咯，地產泡沫白粉又嚟嘞，大家齊齊吸喇、索喇，「獅子山下精神」？梗係癡人說夢喇。
地產泡沫係麥理浩首創，肥彭發揚光大，九七後遭到中方及廢董咒罵，重話立志要戒，甚麼高科技港、中藥基地，大話連篇，結果都係要索番呢隻粉，七年來當做發一場夢啦！
傳真︰2623-9278
電郵︰