正所謂人逢喜事精神爽，朗尼前日啱啱度過十九歲生日，就先博到十二碼，然後自己埋齋，幫曼聯二比○擊敗宿敵阿仙奴；賽前重收到女朋友仔高蓮嘅名表做生日禮物，懶理阿仙奴領隊雲格話佢插水博十二碼。
高蓮送畀朗尼嘅生日禮物係一隻一萬五千英鎊（約二十一萬港元）嘅名表，最特別就係高蓮用朗尼張附屬信用卡畀錢，朗尼變相用自己錢買禮物畀自己；不過對喺曼聯賺緊五萬鎊周薪嘅朗尼仔，自然濕濕碎，事關朗尼之前已送過名車同珠寶畀高蓮，少少錢又算得咩。
據聞朗尼同高蓮兩口子喺對阿仙奴賽後齊齊慶祝生日，雖然雲格賽後抨擊朗尼「插水」，博到十二碼畀曼聯先開紀錄，不過朗尼都懶理，同愛人共度春宵緊要啲。
前晚曼阿大戰萬眾矚目，其中正在齊齊養傷嘅曼城孫繼海同曼聯小將董方卓，就齊齊到奧脫福球場睇波；董方卓都好識做，負責照顧揸住枴杖嘅老孫，重有曼聯球迷祝福老孫早日康復㖭。確實，孫繼海膝部傷勢唔輕，咁快可以揸枴杖到球場睇波，我求大俠都祝佢早日康復。
前日英超重有一場好精采賽事，紐卡素比賽最後階段四比三挫曼城，全靠比拿美個入波，有電視鏡頭重影到佢入波後，向曾經有過不和嘅領隊桑拿士「問好」㖭！不過，桑拿士賽後無怪責比拿美，但就希望以後呢位威爾斯前鋒見報，都係幫球隊贏波，而唔係負面新聞喎！
費倫天拿前日作客烏甸踢成二比二，算唔錯戰果，估唔到教練文當尼高賽後突請辭，第二日即刻被炒。我求大俠講句公道話，文當尼高未必好有料，但今季費倫幾乎換晒成隊人，要迅速執好隊波又確難啲。隊波季初戰績差，唔應係佢一個孭晒，亂開水喉嘅一樣有責任。
噚日講過卡卡情場得意，其實佢喺球場重生猛，前日喺米蘭打吡賽幾次個人突破都博到犯規，結果迫到國米球員用超技術攞咗四面黃牌，都咪話佢唔犀利。其實早場阿仙奴大戰曼聯，雷耶斯嘅遭遇相若，最後亦博到對方兩件攞黃牌。冇辦法，技術型球員係要比人醒多幾腳。