人人都預咗個市昨日會跌，一開市，恒指已經冇咗200點，收市埋單計跌幅相若。隔晚已有C輪或P輪者，幾乎輸贏已成定局。早段買P輪者，到收市時未必有乜嘢着數。早段低位買C輪者，到中段之時可能已有利潤。不過能夠把握低位入市做即日鮮有錢落袋者好少。
中移動C輪：拉低恒指最多嘅係中移動（941），收22.30元，唔見60仙，恒指因此拖低38點。窩輪龍虎榜上，頭3名就係中移動P輪9869、9900、9925，升幅由45%至70%不等，3隻輪成交金額炒埋一碟只係半百萬元多啲，隻隻都係仙輪，輪價變化好易誇張。食得鹹魚抵得渴，炒呢類輪要預咗賺蝕幅度好大，賺蝕速度好快。只要正股唔升唔跌，揸呢啲輪就會輸錢。
中移動C輪自然冇運行，帶頭跌得最多嘅係9907，26球易手，散65%。中移動有可能下試22元，低位博反彈揀C輪炒，9813係正路之選，12月初夠鐘，輪價16.2仙，溢價0.9%，槓桿率13.8倍（有效11.1倍），引伸波幅24.8%。
長實C輪：長實（001）收63元，跌1元，熱門C輪2249收29.5仙，重創16%。長實60.5元至62元係8月中彈升前密集區，估計呢個範圍有強大市支持力，低見此位博反彈吼C輪，對象係2249。
和黃C輪：和黃（013）收57.75元，跌1.25元，熱門C輪2157收36.5仙，散15%。和黃56元至57元係8月中彈升前密集區，估計呢個範圍有強大支持力，低見此位博反彈吼C輪，對象係2157。
章盛