歷史悠久嘅中區警署最近成為市民力保嘅殖民聖地。立法會經濟事務委員會噚日討論呢個題目，個個議員把口都贊成保護古建築物，但係保皇黨始終係保皇黨，一條簡單嘅動議，即時再次現形。民主黨李華明喺會上整咗條書面動議，促請政府引入非牟利機構營運古迹，同埋批出合約要以考慮保護古迹因素行先。
呢啲咁基本嘅要求，睇落都唔會有人反對，點知重未投票，民建聯嘅陳鑑林就心虛起上嚟，發難指摘肥仔明，話佢個動議內容明明喺會上都討論過，根本毋須以動議形式再傾。陳鑑林重話，有人想喺日後用今次投票嘅結果，攻擊民建聯反對保護古迹，「立心不良」。主持會議嘅田少都忍唔住寸佢「點投票係你哋自己決定」，言下之意，民建聯無理取鬧。
喺肥仔明要求下，委員會用記名方式點票，除咗民主派嘅單仲偕、湯家驊、李華明、譚香文，連工聯會鄺志堅都憑良心投贊成票。至於自由黨嘅楊孝華、劉健儀、林健鋒、梁君彥，同泛聯盟嘅石禮謙、何鍾泰，同扮有苦衷嘅民建聯陳鑑林、黃定光，就齊反對。
（圖）認住啦，呢班舉緊手嘅議員全部都反對民主黨提出引入非牟利機構營運中區警署古迹群嘅動議。
傳真︰2623-9278
電郵︰