唐英年噚日出席倫敦證券交易所在港設立嘅亞太區辦事處開幕儀式，半途出家做財爺嘅唐唐致歡迎辭時，提到呢間證交所嘅背景，竟然口快快話人哋有逾二百年歷史，但唔肯定係唔係「最老」嘅一家，要主人家倫敦證交所董事長高博深（ChrisGibson-Smith）點頭提水，都咪話唔瘀皮。
查實倫敦證交所前身為17世紀末倫敦交易街嘅露天市場，當時只係買賣政府債券嘅「皇家交易所」，1773年先遷入室內，正式名為「倫敦證券交易所」。1802年獲英政府正式批准，經過多年兼併發展，現為全球第四大市值嘅交易所。
至於辦事處噚日開幕，除咗有剪綵外，重入鄉隨俗切燒豬，原本想舞埋獅，只因唔夠地方而作罷，企足兩粒鐘嘅記者心諗，好在未有打埋小人唧，小人係邊個？梗係千古罪人彭定康喇。
（圖）（左起）高博深、倫敦證交所亞太區總裁祝曉健、唐英年同倫敦金融城首長費樂彬一齊切燒豬。
傳真︰2623-9278
電郵︰