秋官效應果然非同凡響，噚日新劇一出，大市就勁跌近200點。坊間口痕友重話，外圍唔多掂，睇嚟港股重有得跌，小初聽到都覺得唔開心。
雖然大市急跌，但唔少股票仍然逆市上升，認真唔到你唔服，好似個別澳門賭業概念股如新濠國際（200）同埋澳門實德（487）就繼續炒上，尤其係後者，遷冊事宜已到尾聲，將在下個月初完成，江湖傳聞到時會係重提批股集資之時。
另外，鞋股永恩國際（210）升勢亦未有減退，噚日繼續熱炒，最高見過1.10元，收1.07元，升5.94％，成交股數2664萬股，金額2849.8萬元，股價又創今年新高。經紀黃話，似乎愈嚟愈多芬佬睇好永恩的前景，願意跟進買入。
究竟大陸宏調結束未？實在言人人殊，但在大陸搞零售呢個概念，似乎一直為芬佬所受落，永恩在大陸開設的專門店同專櫃愈開愈多，而公司亦打算興建幾個物流中心以作支援，加上公司盤數又見得人，獲得芬佬繼續支持唔係意外。
慕容小初