成奎安（大儍）患咗二期鼻咽癌仍堅持到惠州賽車，可惜因為撞車而退出比賽，原本前晚佢答應為惠州賽車晚宴唱歌助興，但大儍一去到會場就話：「多謝大家，我因為感冒唱唔到，希望大家多啲贊助支持賽車活動。」跟住佢就返酒店休息，然後喺噚日返香港接受治療。
噚日中午時分，大儍由朋友陪同下抵達浸會醫院，現場班記者即刻起哄，大儍怕騷擾到其他病人，於是猛叫大家冷靜啲。問佢係咪做化療，佢就話：「唔係，今日只係登記同打點滴，聽日先做化療，化療做七個禮拜，一個星期做六次，每次做二十分鐘。」
大儍好有信心咁話做化療一啲都唔擔心，重認為今次個病未必同食煙有關，佢話：「有個朋友唔食煙都有呢個病，可能係同飲食習慣有關。」大儍臨入院前，有記者叫佢保重，令大儍好感動。另外，陳淑蘭原來喺好多年前契咗成奎安做契爺，噚日喺港台做完節目嘅佢，問佢重有冇同契爺聯絡，蘭子話：「其實我哋好耐冇聯絡，我都係睇報紙先知佢有病，我諗我唔會刻意打畀佢，不過佢咁好人，一定冇事嘅。」
二人女子組合2R噚日去咗西貢拍攝一輯介紹海鮮嘅短片，Rosanne話佢有次食咗啲唔新鮮嘅蝦之後就全身又痕又腫，嘴唇變「孖膶腸」，重連喉嚨都腫到唞唔到氣，最後要去急症室打針。Race重好衰咁爆埋當時有即刻幫家姐影相留念，佢話嗰時見到家姐個嘴咁厚，覺得好好笑，不過後來怕佢會出事，所以驚到喊。
憑《Clean》勇奪今屆康城影后嘅張曼玉，原來早幾日去咗夏威夷國際電影節，佢部戲係電影節開幕電影，張曼玉特別喺放映會開始前同觀眾講吓嘢，原來主辦大會重邀請佢擔任今屆電影節嘅評審㖭。另一方面，由於主辦大會希望表揚張曼玉對影壇嘅貢獻，重會頒發特別演藝獎畀佢。
伍佰日前喺馬來西亞參與「2004SuperConcert」演唱會，吸引咗四萬歌迷去到捧場，現場歌迷不停尖叫拍掌，令到伍佰表演時更加落力。但現場有歌迷就因太擠迫而發生衝突，最後演變成打鬥，有歌迷重要入院醫治。
葉璇噚日帶病出席無綫劇集《本草藥王》嘅拜神儀式，葉璇被問到男友熊倪有冇慰問佢時，即時黑面咁話：「我唔想再講呢個人，大家只係普通朋友，而且大家係兩個世界嘅人。呢啲係我同佢之間嘅事，令大家唔可以發展落去，我哋之間嘅嘢係私隱，唔可以講，我亦唔想講人哋唔好嘅嘢。」
