故事天馬行空嘅卡通片《衰仔樂園》曾經喺美國掀起熱潮，而卡通嘅兩位創作人杜利柏加（TreyParker）同麥特史東（MattStone），最近又有新搞作，佢哋用咗半年，製作出玩盡政治人物兼荷李活紅星嘅木偶動畫《T.A.反恐戰隊》。
呢部木偶動畫未上映已經新聞多多，奧斯卡影帝辛潘（SeanPenn）早排寫咗封以粗口作結嘅公開信，炮轟佢哋唔應該叫啲唔知選邊個做總統嘅選民放棄投票，柏加就話因為辛潘喺部戲入面被玩先至發脾氣，不過佢兩個就想多謝辛潘，因為俾佢鬧一鬧，部戲又多咗人注意。
《T.A.反恐戰隊》擺明諷刺布殊所謂嘅反恐戰，柏加同史東又覺得辛潘、佐治古尼（GeorgeClooney）等影星盲目反戰，好適合做喜劇題材，所以安排佢哋俾想毀滅世界嘅大魔頭金正日蒙騙，揸晒槍對抗反恐戰隊，而一向反布殊嘅米高摩亞（MichaelMoore）重變成恐怖分子㖭！