章小蕙同導演楊凡、吳嘉龍前晚喺港台接受訪問，宣傳三級片《桃色》，有聽眾致電問章小蕙接拍該片後用乜嘢態度去面對子女？章小蕙話：「我好緊張個仔俾人笑，我個仔得十四、五歲，佢話俾人笑呢部戲係唔着衫嘅戲。我問番個仔自己點睇，佢就話我呢套係高質素、高貴嘅戲，佢好支持媽咪做嘅嘢，仔女都知道我係用嚴謹嘅態度做每一件事。」
不過章小蕙起初就好擔心年老嘅阿媽會接受唔到佢拍呢部片，於是楊凡就約章小蕙阿媽食飯做輔導，重解釋畀佢聽呢套係藝術片。章小蕙又話本來想楊凡送一張環遊世界嘅機票畀媽咪，等佢去一個冇電視嘅地方。而楊凡喺見完章小蕙阿媽後，就讚佢係一個明白事理嘅高貴老人家。
章小蕙又承認已洗腸一年嚟排毒。有傳聞章小蕙狂冧中港台嘅富豪，身價約五十萬，佢話：「我同朋友食飯冇價，我都冇興趣食應酬飯。」問章小蕙究竟有冇俾人問過價，佢話：「唔關《桃色》嘅嘢唔回應。」
周華健同五月天前晚喺台灣中山足球場舉行「滾石群星演唱會」，由於台灣受風雨影響，在場三萬名歌迷均需穿上雨衣捧場。周華健唱《你現在還好嗎》打頭陣，其後唱英文歌嗰陣，五月天兩位成員以結他伴奏，佢哋異口同聲話喺周華健面前彈結他，感到非常緊張，更不時手震，因為自覺係班門弄斧。
台灣名模林志玲噚日喺當地為LeeCooper牛仔褲行緊騷嘅時候，突然忍唔住喺度呻，話佢呢排工作繁多，搞到佢好攰，好想有個休息嘅機會。佢話：「我現在只有上妝之後才有元氣，最快明年一、二月才能好好休息，多一些私人生活，心情才會比較開心。」
何潤東日前喺內地拍攝劇集《中華英雄》打鬥戲時，鼻子被踢中，送院後發現鼻樑骨折，噚日佢去醫院檢查嗰陣，醫生就話佢已無大礙，何潤東笑住口話終於唔使再擔心破相，不過今日就要繼續為劇集開工，幸好導演程小東對佢十分體諒，暫時只會畀何潤東拍攝文戲。
吳孟達近日喺內地拍緊香港導演賴水清嘅新戲，喺日前拍戲時被一隻駱駝踢傷左腳，腳骨裂咗，要即刻送入院治理，好彩達哥傷勢唔算太嚴重，佢話希望可以快啲出院趕工。而佢講講吓又提到周星馳，佢話因冇份演《功夫》，被外界指二人關係決裂，其實冇咁嚴重，不過佢話星爺同李力持不和就真嘅，星爺重曾經淚眼汪汪咁同佢講話點解李力持唔可以體諒佢喎。
黎小田早排喺跑馬地開咗間PianoBar，近日Ba叔陳達志入股，間酒吧重改埋名做AhBaPianoBar，前晚好多朋友送花牌去祝賀，馮仁昭十點左右到，就見到黃百鳴，而吳國敬同鄧建明就搭住膊頭到，佢哋當時已經飲到面紅紅，好開心咁。
