早前索記部S700i一嚟就炒個不亦樂乎，由官方行價$4,980炒到上去成$5,580，雖然外形夠型仔只係其中一點，但係佢個百萬像素靚鏡頭都認真功不可沒。比起同樣標榜百萬像素嘅手機靚得多。其實大家話晒都叫「百萬像素」，點解影出嚟嘅相質素相當參差，有啲影出嚟重仍然朦郁鬆。其實單憑「百萬像素」呢樣嘢，的確係好過30萬像素相機，不過最重要都係要睇番鏡頭嘅質素。
文：Phone人院
現時手機鏡頭主要分為CCD及CMOS兩大種類，前者就係質素高，不過耗電量亦高，所以通常數碼相機先會見到，而後者則夠慳電，兼且來價平，一般都係平價Web-Cam同低階DC仔所採用。但係今時唔同往日，𠵱家嘅電池「容量」比以前大得多，耗電量唔再係一個好重要嘅課題，所以愈嚟愈多手機廠採用CCD鏡頭。而𠵱家市面上賣緊嘅百萬像素手機之中，暫時就只有SHARPGX32同索記嘅S700i係用CCD鏡頭，加上顯示器有成320×240像素，顯示相片質素明顯高出幾皮。當然CCD鏡頭影得靚，點解其他手機廠又唔用CCD鏡頭？咁呢個就梗係成本問題喇，畀得個靚鏡頭你，部機又賣貴幾嚿水，最後咪又係羊毛出在羊身上。
