英國外交部次官韋明浩，今日又光臨特區，展開工作式訪問嘞。韋明浩將會親自了解特區市民對○七○八政制改革嘅真正民意，會見立法會議員，跟住就會飛往北京，同中國官員商討北韓核彈問題嘞。
韋明浩來特區巡視，梗係一件好事。英國係中英聯合聲明簽署國，中英聯合聲明係一項國際公約，地位神聖，條文字字莊嚴，直至二○四六年，英國監察中英聯合聲明嘅忠實執行狀況，自然係責無旁貸。
所以今次韋明浩訪港，若然港人把握良機，向韋哥熱烈反映對政制改革嘅意見，咁呢位中英聯合聲明簽署國嘅外交首長，除咗可以更好地協助董團夥齊齊打造香港「亞洲國際都市」形象，對於促進香港經濟消費、旅遊業，同埋減少失業率，都有好深遠嘅正面影響。
呢嗱，例如今次韋哥計劃會見立法會議員喎。中國方面，日前高調喝斥長毛，話唔歡迎長毛去北京進行工作訪問，重暗示有長毛喺立法會一日，就冇可能請晒六十名議員齊齊訪問北京咁講。中方講嘢之後，即時遭到長毛強硬反擊，指出中方係侮辱緊香港市民。
𠵱個問題，又可以分開兩層嚟講。首先人哋中方有請邊個唔請邊個嘅派帖自由。香港哋擺酒賀生日娶新抱，無論係毛錢聯婚，定係何府宴客，唔派帖畀你即是唔想你嚟，冇收到帖嘅，分分鐘重慶幸自己走甩一身彩，因為毋須破財做人情，以及毋須同成枱三九唔搭八嘅生面口坐足成晚，好似上次訪京團啲泛民主派咁，遭人強迫睇埋晒啲新郎新娘點相識嘅舊相、註冊當日去接新娘嘅戥穿石講價video片段，簡直悶到抽筋，長毛冇得去北京，係執到，佢去埋，分分鐘人哋中央會好似對待河南省大平礦難家屬咁，俾啲梁家傑食剩嘅飯菜招呼佢，咁咪盞長毛重把火？
不過說話又講番轉頭。長毛嘅師傅兼偶像哲古華拉，喺六十年代，亦得蒙偉大領袖死鬼毛主席邀請訪問北京。咁連毛澤東都可以邀請長毛師傅，由毛伯嘅好學生兼隔代傳人胡溫，邀請埋長毛上北京，交流吓馬列主義理論，地位完全對等，又有咩唔得？唔通中共有種族歧視，對鬼佬哲古華拉就笑笑口，對哲古華拉嘅炎黃子孫接班人就藐藐嘴？
中方唔見長毛，韋哥高調接見，就可以平衡番民意，向長毛嘅六萬幾選民作出交代。話時話，作為中英聯合聲明簽署國嘅英國，自從馬卓安喺十年前邀請過李柱銘、楊森訪問唐寧街十號首相府之後，都好耐未接見過香港立法會議員，唔通連英國都相信咗香港變咗一個中國沿海普通城市？
喺布殊連任後，貝理雅係咪應該高調邀請番兩名民主派議員訪問倫敦，協助打造香港作為國際城市嘅地位咁呢？若然請兩名，一個就梗係長毛，另一個名額，就由李柱銘、大班，同埋最近人氣急升嘅張超雄抽籤。
長毛着T恤入唐寧街，完全冇問題，因為當年聖雄甘地，都係着件麻布、撻對草鞋去見邱吉爾呀。
傳真︰2623-9278
電郵︰