日本朋友生日請食日本菜，果然不出所料，賓客九成準時到場，十成都穿戴整齊，雖不致是盛裝，但全部光光鮮鮮，儀表出眾。一枱十五人，只有我一個香港人，連埋我亦只有四個男士，左右隔籬都係女仔，感覺好幸福。
朋友為我介紹新朋友，全部都是由日本來港工作，有幾位會講普通話，另有幾位竟然能講流利廣東話，連「嘅」、「呢」、「噃」都講得似模似樣，佩服得很。
跟真正日本人一起食日本菜，正好趁此機會看看真正日本人如何食日本菜。菜來得很慢，每樣少少，吃是副，喝酒談天才是主菜。喝的是近期流行的日本燒酒，加冰塊之外，可選擇加檸檬片或酸梅。「咦？乜你哋食日本嘢唔係加咁多wasabi？」我見大家的豉油碟內都只是得豉油，於是問道。「食刺身我們會加wasabi，但吃壽司與MakiRoll，因為裏面已有wasabi，不用再加。不過其實我哋日本人都唔明香港人點解食乜都用咁多wasabi，因為其實加得太多wasabi，原本的味道都被搞亂了。」
「咁有冇同香港男仔拍拖？」酒過三巡，可以進一步問無謂嘢。「有試過，但係都唔work，」尚子喝了一口燒酒加酸梅，「我是一個性格獨立而且有主見的女孩子，但當我說出我的看法時，香港男孩子會覺得很詫異，他們會問為甚麼我不像傳統日本女孩子。」「香港人普遍有這個錯覺，以為日本女子全都柔順過柔順劑。」「錯覺個鬼，不如說你們看得太多翻版日本VCD，你們其實真心想交往的不是日本女子，是日本VCD女子才真！」冇嘢講，飲杯！