樓價展開升浪，遲啲入市，分分鐘要畀貴啲，但也有例外，可以執到平貨。紅磡海逸豪園有件貨，就以低於市價一成賣出。
單位冇乜唔妥，只不過因為業主突然接到領事館通知，短期內移民，所以惟有監平賣。
呢個二十座低層EF相連戶，共近千五呎，以六百四十萬賣咗畀同屋苑租客，每呎僅四千三。業主唔夠一年，賺六十五萬。
利記趙文基話，屋苑本月有二十九單買賣，呎價逾五千二。
發展商賣樓，宣傳手法層出不窮，主要打心理戰，正路做法係交投放緩送優惠；市旺就話削優惠兼加價，但偶然會有逆市而行，希望出奇制勝。
南豐近日出咗個廣告，話小欖浪濤灣照價減一成，二百萬有找。喺個個覺得樓價有升冇跌之際，呢個廣告都幾震撼，最低限度想喺呢區置業嘅都會留意。高調話減價嘅廣告，近期都係第一次見。
睇番恒隆低價開賣長沙灣碧海藍天，一日賣出三百幾伙，就知呢招嘅威力幾大！
九鐵尖沙嘴支線噚日通車，尖東受惠，區內寫字樓業主趁勢放售單位。
永安廣場五樓全層，近二萬二呎，現正標售，下月三十截標。代理中記陳玉雲話，該層分為十五個單位，部份租出，月收逾三十六萬，租期最長至○六年底。
佢話，單係今個月，尖沙嘴已有三宗全層商廈成交，總值逾億半。
永安廣場上個月有個近五千呎單位易手，每呎六千，一個月升值一成。同區現有幾層正在標售，睇嚟市況會幾熱鬧。
港人深信風水命理，為咗迎合呢個潮流，美記培訓中心日前舉辦「風生水起」專業風水課程，請嚟風水師黃震宇主講，講吓點樣鑑定住宅吉凶，以及室內外環境布置，與風水關係，戲肉係點樣化解不利環境。
逾三十個前線員工出席，部份攞埋客人嘅單位嚟問黃師傅。
風水呢啲好多客都感興趣嘅話題，代理能夠同客搭上幾句，肯定容易做成生意。之前美記都曾經辦過多次風水班，可見呢類課程歷久不衰。
信和集團姊妹公司新加坡遠東機構，旗下兩個星洲樓盤Central及Vida，喺香港舉行展銷會，近五百人到場，三日賣咗五伙。另外有八個客預留單位，幾十個想實地睇樓。
遠東機構副營運董事謝文華話，下個月再喺本港舉辦展銷會。
代理美聯測量部行政總裁張一輝話，其中一個曾喺英國住過一排嘅港客，用六百七十八萬，買咗Central兩個六百三十五呎單位長線投資。
一手新盤熱賣，代理近水樓台，好多都順手入番間。呢類消息近排相當多，中記執行董事陳永傑，今年入咗唔少新盤，最新一間，係荃灣爵悅庭西爵軒四十二樓G，七百七十六呎，作價三百五十萬，每呎四千五，市價。
可以參考嘅市價有同座G，三十九樓，呎價四千一；四十九樓就四千六。
佢入過嘅新盤，有長沙灣碧海藍天、清水灣道8號、西灣河嘉亨灣、油麻地窩打老道8號，同埋屯門聚康山莊。部份已經沽出，賺咗錢。
電郵地址：
