係人都知班亞弗力（BenAffleck）係波士頓紅襪隊嘅忠實擁躉，有親比賽佢都會去捧場，過往佢亦曾經帶過舊愛珍妮花洛庇絲（JenniferLopez）入場睇紅襪隊比賽，今次喺班仔身邊嘅就換咗新女友珍妮花嘉娜（JenniferGarner），而今次重係佢哋拍拖後首次高調出席公眾場合㖭。
前晚班仔同珍妮花現身波士頓紅襪隊嘅主場，睇佢哋迎戰聖路易斯紅雀隊，呢場賽事係北美職棒大聯盟冠軍爭奪戰嘅第一場賽事，班仔自然特別緊張，不過激戰期間，班仔不忘同珍妮花纏綿一番，兩人不時喁喁細語，相當甜蜜。最終紅襪隊亦冇令班仔失望，以十一比九擊敗對手，場數暫時領先一比○。雖然班仔部新片票房欠佳，但呢期佢有靚女相伴，捧嗰隊波又贏埋，相信佢都可以飲得杯落。
另外，提起籮霸，原來佢已經將佢喺比華利山嘅豪宅，以一千二百五十萬美元（約九千七百五十萬港元）嘅價錢賣咗，事實上六月嘅時候佢就係喺呢間屋同老公MarcAnthony舉行婚禮，據聞佢兩公婆重諗住一齊做巡迴演唱搵銀㖭。