呢排咁多股票搞批股，但好幾隻復牌後表現都唔差，例如之前的國美（493），近期的新濠國際（200），連上周搞批股的勝獅貨櫃（716），復牌後不但股價守得住，兼且有人話繼續睇好。
勝獅上周以先舊後新方式，每股3.93元配股集資3.88億元。復牌當日一度有沽壓，但好快已經回升，上周四假期前夕，港股先跌後穩，勝獅更升達3.23％，收4元，相當威猛，成交金額有2217.4萬元，唔係乾升。
經紀黃話，呢期航運股大部份仍被睇好，作為全球第二大集裝箱製造商的勝獅，當然亦會受惠，今次集資係用作擴展生產線，提升產能之用，但估計到後年先至見效，但由於大家預計勝獅業務增長強勁，所以仍然睇好。
另外，經紀黃又話坊間流傳新確科技（1063）亦想配股。新確自從7月底公布中期業績靚仔，以及證券界長毛申報持有新確股份後，股價就一直升到唔停，一度升穿2元水平。個價靚成咁，若然有證券行話幫手批股集資，都咪話唔心動。新確上周四跌4％，收1.90元。
慕容小初