無綫台慶下月舉行，當中最矚目是「我最喜愛的男、女主角」花落誰家，而被視為熱門人選的林保怡和黎姿，在頒獎禮舉行前竟齊齊跟無綫斟洽經理人合約，難免令人聯想到無綫欲以此作獎項條件。
繼早前本報報道無綫在台慶頒獎禮舉行前，跟林保怡密斟經理人合約後，原來無綫近日亦有意羅致黎姿為旗下經理人合約藝人。一直以來，黎姿跟保怡一樣只是跟無綫簽部頭合約，由於黎姿近日憑《金枝慾孽》人氣急升，加上她跟無綫部頭合約又於下月屆滿，無綫趁機力邀黎姿加盟旗下，據知已傾得七七八八。
記者昨日致電製作資源部副總監樂易玲了解時，她說：「我承認有接觸過佢哋，佢兩位都係專業演員，我哋當然希望羅致旗下啦！」問她可擔心被指以合約作為換獎條件？樂易玲笑說：「絕對唔擔心，無綫有五、六百個演員，平均每個月我哋都會同好多演員傾約，係啲人敏感啫。」
黎姿昨日回應說：「TVB係有傾過，但未係咁detail，我拍完《妙手仁心Ⅲ》之後，同無綫嘅合約就完，我想休息一吓先至再諗，因為都忙咗好耐。」問到會否以簽約換獎時，黎姿說：「我睇獎睇得好淡，就算今年攞唔到，下年都可以努力過，今年攞到獎，又唔係唔使做，下年冇好劇本咪重死，我覺得好劇本重要過攞獎。」
此外，無綫昨日公布台慶八喜臨門連環賞候選名單，並安排在奧海城出席活動的現場觀眾選出心目中「本年度我最喜愛的男、女主角」，結果「男主角」方面，《青出於藍》的歐陽震華以四十八票排第一，《棟篤神探》的黃子華以十六票屈居第二，而《金枝慾孽》的林保怡則以十三票排第三。
至於「女主角」方面，《金枝慾孽》的鄧萃雯以五十九票大比數拋離對手，同劇的佘詩曼獲十五票排第二，而《陀槍師姐》及《棟篤神探》的蔡少芬則獲七票排第三。
採訪：陳月萍、戴彩煥、卓美娟
