成奎安得悉自己患有二期鼻咽癌後，並未感到畏懼，日前他更到惠州賽車，可惜前日他因撞車要退出比賽，幸好沒有受傷。昨日他表示甚有信心戰勝癌魔，故不會預早立遺囑。 記者魯萍、葉瑞惠州直擊
現年五十歲的成奎安（大儍）患上鼻咽癌，需要接受化療，但他入院接受化療前，仍組成了東華成奎安車隊到惠州參加亞太汽車拉力賽，可惜前日傍晚他中途撞車而被迫退出分段賽事，而昨日的最後兩場賽事，大儍亦臨時放棄參加。
幸有買危疾保險
大儍昨日在惠州接受本報記者訪問，他說：「原本今朝都會賽車，但架車噚日炒咗，咁今日場賽事就冇參加，而今晚閉幕酒會我就唔表演，因為𠵱家只得番半條人命，不過為畀面贊助商，我會到一到嘅。聽日（今日）我就會返香港入院打抗生素，二十六號（明日）就做化療，整個療程要做兩個月，另外我又會睇中醫，我好有信心砌低佢，呢場仗我一定贏，所以我連遺囑都冇立到。」
大儍透露自己從來沒有想過會患癌，所以當他在本月一日得悉此事後，感到難以置信，而他亦第一時間向曾患鼻咽癌的尹志強求助，他說：「尹佬畀咗好多意見我，而屋企人知道後都好唔開心，佢哋好支持我同癌魔搏鬥。」
大儍續說：「今次我嚟賽車成家人都嚟晒照顧我，真係令我好感動。其實呢個病之前都有徵兆，早排我已覺得頸腫，又有耳鳴，瞓得又唔好，月初我去印度拍韋家輝套賀歲片，拍完返嚟就即刻入咗醫院檢查，點知一檢查就知係鼻咽癌，好彩上年因為有沙士，我買咗危疾保險，所以醫藥費唔成問題，不過啲朋友知我有病，個個都好關心，我一日二十四小時係咁接電話，接到煩，咁咪連電話都熄埋。」
心情煩躁發脾氣
現階段大儍已開始服食醫生所開的抗癌藥，他說：「食咗啲藥後，心情有啲煩躁，呢排我成日會發脾氣鬧人，我已經盡量控制自己嘅情緒，上個禮拜我已經入院做咗一個倒膜，係做化療時用，喺呢兩個月我會停晒所有工作，煙酒都會戒，阿倫叫我戒色，佢成日亂噏，醫生叫我食番肥啲增強抵抗力，𠵱家我一日食六、七個麵包，胃口都唔錯。」
大儍自言身體一向不錯，所以沒想到會患癌，他一時感觸眼泛淚光說：「活到五十歲，𠵱家先知道健康係幾咁重要，不過呢排啲朋友咁關心我，真係令我好感激，有朋友都有勸過盡快返香港，唔好嚟賽車，但贊助商贊助咗車隊咁多錢，我又點可以唔嚟，我𠵱家體能OK，大家唔使擔心。」