香港某一啲中學校長，喜歡原地踏步，唔鍾意改變，最好十年如一日，「溫故支薪，坐以待幣」（本來係「溫故知新、坐以待斃」嘅，以前有啲同學唔喜歡懶惰老退教授，上堂只抄古舊筆記，教書全無新意，每個月坐吓坐吓，唔使做，就攞豐厚薪酬，所以用「溫故支薪、坐以待幣」呢兩句嚟諷刺佢哋）。
中學校長每年年薪九十幾，接近一百萬，納稅人算係待佢哋唔錯。喂，𠵱家教統局想追上時代，改用三三四學制，列中英數通識教育為必修，另外三科為選修，學生讀少啲（𠵱家修八至十科），多啲時間深入溫習，甚至做專題報告，對學生有乜唔好先？
《蘋果日報》十月二十二日A6版大字標題，「中學校長轟學制改革、學科收窄令學生知識薄弱」，內容引用教育評議會執委許為天校長之言。呢位許校長都多餘嘅，請問佢間學校啲學生現在又點樣知識廣博呀？香港好多中學生不懂歷史，不懂國際時事常識，不懂中國地理，都唔知佢哋強在邊瓣。新學制令學生學習範圍收窄，反而更可讀得深入一啲，除非啲校長懶、教師懶，學生又懶，咁就冇得好講。如果校長乜都唔肯做，淨係想「溫故支薪」，教統局應該叫佢哋提早退休，唔好阻住地球轉。
又有校長老師話通識教育難搞，唔知點教，真係懶到出汁，其實已經有八十間中學開辦通識教育課程，老師努力摸索，自製教材，唔知幾好心機。聖保羅男女中學教通識教育嘅老師，據講係耶魯畢業生，相當投入。美國長春藤大學好注重通識教育，學生必修文理科目。香港啲大學只讀三年，出到嚟教書，係蝕底啲，此正所以要推動三三四學制也。