水晶宮日前大勝西布朗，射手安迪莊臣又有兩個「士哥」，喺聯賽神射手榜繼續排前列，力追亨利，又助球隊擺脫包尾位置，認真威威。
安迪莊臣現時已經有七個入球，我求大俠翻查近年英超往績，好耐都未試過有升班馬前鋒可以躋身「士哥」榜前列，印象記得除咗當年新特蘭菲臘斯同葉士域治史超活外，近兩三年都無突出英倫新紮土炮彈出。水晶宮領隊杜維賽後狂讚安迪莊臣，話佢有頭槌、遠射、又夠勇，只得二十三歲，重有好多進步空間，讚到天上有、地下冇。
我求大俠覺得安迪莊臣同菲臘斯、史超活最唔同地方，亦係夠年輕，唔會一、兩季就無晒。不過，最醒莫過於水晶宮，早早同呢位上季英甲射手續約五年，好有機會賺筆可觀轉會費咯。
熱刺日前主場輸畀保頓，得唔到剛逝世嘅名宿歷高臣庇佑，領隊辛天尼賽後就更加拒絕出席記者會；熱刺連忙發表聲明，解釋辛天尼唔出席記者會，係因為對球隊表現好失望，絕無唔尊重歷高臣，等大家唔好亂估。話時話，印象中好少有名宿剛去世，隊波即刻喺主場輸波咁慘喎。
AC米蘭球星卡卡喺米蘭打吡戰前獲喜訊，佢巴西女友卡洛蓮獲家長准許搬去米蘭。話說卡卡未來外母不嬲反對小妮子搬去米蘭住，怕個女得十七歲去到米蘭呢個充滿誘惑嘅大城市會學壞。其實呀「伯有」唔使擔心，個女係模特兒點都見過吓世面，AC咁錫卡卡，會愛屋及烏。
近期中超混亂不堪，估唔到呢陣風吹到日本。鹿島鹿角主場上周六輸畀浦和紅鑽後，球迷用啤酒罐掟球員，重有三十幾個球迷衝入球場同球員講手，要警察調停拉人，涉及球員本田泰人亦要接受球會內部調查，非常罕見。鹿角一向係爭標分子，今季兩手空空，球迷不滿情緒確實難免。
F1賽事近幾年為咗增加賽事娛樂性同埋阻止法拉利「一隊」獨大，改例已成平常事，好似排位賽就改完又改，聽聞下年第二次排位賽會安排喺周日比賽當日舉行，即係玩完排位賽冇耐又要投入比賽，時間咁迫切肯定對車隊同車手係好大考驗，不過最緊要唔好影響到賽事嘅安全性。