上周五美股唔掂，港股短期內好難有運行。恒指上周五收報13015，萬三點話破就破。賭窩輪，肯承擔風險嘅做法係買P輪，唔想賭嘅就等多一陣，喺低位撈C輪博反彈。美國總統大選，小布殊若能勝出，對美股及全球股市或者會有利。
恒指P輪：恒指估計會下試12800，若果認為有水位，買恒指P輪，有兩個對象可以選擇，就係2117與4433。
2117年底到期，輪價7.2仙，溢價2.7%，槓桿率24.1倍（有效14.1倍），引伸波幅18%。4433明年3月到期，輪價20.2仙，溢價4.8%，槓桿率12.9倍（有效7.4倍），引伸波幅21.6%。
恒指若然跌得太急，入市高價追恒指P輪，則可能會先行蝕底，做嘢未必有着數。大市跌幅若然太大，則另一手準備係低位撈C輪，9911與4442係對象。9911年底到期，輪價14.6仙，溢價1.6%，槓桿率20.7倍（有效13.4倍），引伸波幅19.2%。4442明年3月到期，輪價14.9仙，溢價4.8%，槓桿率20.3倍（有效10.3倍），引伸波幅20%
中企C輪：國內宏觀調控已漸見成效，第3季經濟數據唔錯。但大市唔得，國企股一樣唔易逆市。
不過，國企指數若果再跌，例如跌到4300嗰頭（上周收4492），則中企指數C輪則有較高嘅值博率，到時搵隻博吓反彈，正路對象係9986，隻輪年底夠鐘，輪價16.6仙，溢價2%，槓桿率7.7倍（有效6倍），引伸波幅37%，近期嘅中企指數C輪，則揀4545。
章盛