上個禮拜六馬會罕有在快活谷跑日馬，於是入場碰吓運氣，結果見到好多老友，亦走咗啲雞。
話說第七場四班跑一六五○，在沙圈見到許雄，呢位前新巴統帥，對八方話自己好好彩，事關佢在位時十幾廿蚊桶油，現時五十幾，都唔知點算。其實新巴搵到佢幫手好彩就真，但咁早畀佢退休，嘥咗。許雄又話佢同七號「華心寶」馬主係朋友，專誠落嚟捧吓場，重畀貼士八方。
結果「華心寶」輕鬆勝出，可惜冇買到，畀跑馬專家恥笑。專家話，「華心寶」同第五場「電算機」同一馬主，兩隻馬本來都安排佩恩騎，但佩恩做唔到一二四磅，結果佢唔騎「電算機」，走去猛焗桑拿減磅，專心博第七場，馬主又呼朋喚友，重唔醒水？
（圖）「華心寶」勝出，許雄（左一）幫手拉頭馬。
傳真︰2623-9278
電郵︰