摩根史丹利董事總經理、主理經濟研究事務嘅AndyXie（謝國忠）博士發表報告，題為DeadCatBounceDying「死貓反彈死緊」（繙譯：死貓嘅反彈已在死亡中），謝博士係著名海歸派，來港數年，已經學曉咗寫報告嘅標題要eye-catching，驚死讀者睇唔到，好似呢篇報告咁，無論內容如何，淨係睇題目都夠晒吸引啦。啲基金經理每日收到十幾廿份證券行研究報告，大都擺埋一邊唔睇，十年前左丁山辦報之時，對沖基金經理N仔每隔兩日就叫左丁山搵人去佢寫字樓接收最新嘅分析師報告，佢話好過當垃圾丟喎。AndyXie好曉捉心理，用此題目，基金經理點都會望吓份報告，想知道何謂死貓，死貓點樣反彈，點解一路彈一路瓜得，反彈就快成為刺破了的泡沫。
謝博士係上海名校同濟大學嘅畢業生，此大學在戰前係德語大學，工科建築科特別有名，現在逐漸恢復舊觀，德國人繼續大力支持。謝博士在同濟讀工科，走去美國麻省理工轉行讀經濟，三四年之間就攞到經濟學博士學位，高材生也。佢在「死貓」報告內指本地房地產泡沫初現，九七地產泡沫爆破之後，今天香港人仍然以地產為經濟中心。近來房地產暢旺，是否泡沫，真係見仁見智。不過謝博士好幽默，講到地產上升嘅原因之中，有（一）本港人均「地產分析師」，全球最高，（二）本港印刷媒介好倚賴地產廣告。言下之意，香港充斥地產分析師，梗係要唱好啦。而報刊亦梗係為咗廣告，加入大合唱。呢樣算唔算叫做搵報刊食死貓呢？
左丁山諗吓，《壹週刊》與《蘋果日報》幾乎與地產廣告絕緣，地產佬呢兩年好睇唔起「壹仔」與「蘋果」，情願喺讀者人數得幾萬嘅地方賣廣告，唔通就因為咁，「壹仔」至夠膽經常唱淡樓市，令啲地產佬媽媽聲？