八方噚日去咗合和搞嘅MegaTower居民大會下集，難得俾件事搞到谷鬼氣嘅哥頓胡應湘肯大方借合和前面塊空地出嚟搞大會，八方都覺得算係咁啦！
上禮拜四居民大會上集，哥頓親自到場解話，但佢事後話好似俾人公審咁，所以噚日唔會到，只係派咗佢副手，即係合和執行董事楊鑑賢代老細解話。可能呢件事對灣仔嘅影響實在太大，而且個大會又喺下晝搞，粗略估計，噚日應該有超過一百五十名街坊出席，好多重無位坐，要企喺度聽足全程㖭！不過，正反兩面嘅論點無乜新嘢。
講開呢單嘢，八方噚日睇《信報》刊登咗哥頓喺一個中大EMBA論壇講番呢件事，哥頓話佢個MegaTower，如某報章所言，真係俾某人嘅契仔所阻撓，而遲遲未能上馬，佢老哥如果攞到證據嘅話，一定去廉署投訴咁話喎！
傳真︰2623-9278
電郵︰