杜汶澤芸芸娛圈朋友中，他以「阿媽」去形容吳君如，以「老竇」去形容秋生，「表哥」是劉德華、「表弟」是余文樂，而陳小春則是「君子之交」。
杜汶澤說：「無論我做得幾好，秋生都唔會讚，好似老竇永遠唔會讚個仔、只會挑剔咁。華仔係我嘅指標，只要我一覺得辛苦，我就會諗起佢，佢紅我咁多，有錢過我咁多，又辛苦過我咁多，一諗起佢，我就會舒服晒。我好錫余文樂，就好似錫表弟咁，所有我嘅朋友都係心地好，心地唔好嘅人，幾叻我都唔鍾意。」
杜汶澤享受跟陳小春的君子之交，他說：「咁多年來，我哋兩個坐低單獨食飯唔會超過十次，私底下都有傾偈，但好少講心事，但係呢種感覺好舒服，朋友互相知道太多秘密好容易出事，疑心一起，就好大鑊。」
眾所周知，杜汶澤與吳君如私交甚篤，相信兩人互知對方不少秘密，問杜汶澤怕不怕有日會跟君如反面？他說：「我係思想老式嘅人，佢一日帶我出道，一日就係我師傅。
「我係嗰種如果大佬突然話要喺大街大巷屙屎，我會勸佢唔好，會話『你係都要喺度屙，就唔好做我大佬嘞』，但佢都堅持要屙，我就會話『咁拿拿聲屙完快啲走啦』，即係我最後都會撐佢同遷就佢，但又唔會卑躬屈膝。」
約明星做訪問，遲到十五分鐘的，叫做準時。當日約杜汶澤於下午二時營業的cafe等，他比約定時間早了十五分鐘到場，碰巧cafe負責開門的員工病倒，老闆急急趕來，到達時已經二時十五分，在樓下呆等了半小時的杜汶澤毫無怨言，可見他的成功並非偶然。
採訪：張止寒 攝影：陳志嵐
場地提供：