老董一聲令下要佢班三司十一局馬仔落區，成班司局長立刻不敢怠慢，要搵地方出巡。響應老細號召，外傳係下屆特首熱門人選嘅唐英年，趁住做署理特首，第一時間落區，算係實習點樣做特首體察民情，但八方覺得佢就似乎體察得唔夠深入。
唐公子噚日先去參觀日間護理院舍同智障人士綜合職業復康中心，然後就走咗去巡深水埗鴨寮街同高登商場，算係了解吓經濟有冇復甦咁啦，重同啲售貨員、鴨寮街檔主有傾有講。
但係有深水埗地膽同八方講，唐公子今次微服出巡，唔事先張揚就冇乜誠意，佢哋個區入面好多綜援戶、重建戶、年老無依住板間房嘅長者，真係好想見吓司長，問吓佢政府為乜要減綜援，佢哋絕對唔係有幾百萬身家重呃綜援個啲人，真係等一百幾十蚊開飯。地膽話如果司長一早開聲，多唔敢講，三兩百人隨時搵到，可以同司長真情對話，或者煮番餐無餸飯請司長食，但係就肯定冇司長飲開嘅八二年ChateauLafite-Rothschild紅酒招呼佢。
不過咁，地膽相信司長真係想體察民情，佢建議司長不如喺深水埗搵間板間房或者單身床位，住番佢一頭半個月，呼吸吓基層空氣，咁就最體貼喇，亦可以證明司長真係有誠意，唔係做騷！
（圖）政府新聞處發嘅唐唐巡區相，同前排阿董嗰啲相又幾似喎。
傳真︰2623-9278
電郵︰