宏安（1222）呢隻股，供股合股有前科，大家聽落，可能有啲怕怕；但係呢隻股勝在轉身夠快，亦勝在夠錢多。
宏安04年手頭現金2.89億元，總銀行借貸1.04億元，淨現金1.85億元，已發行股本1.43億股，每股現金淨值達1.29元。再均真啲，最近4個月，集團先喺7月出售旺角物業，套現7380萬元，又喺呢個月以1.45億元分別購入位於西環及元朗物業或地皮，加加減減，所持淨現金仍有1.13億元，每股現金淨值達0.79元，現股價有近70%係現金淨值。
早喺今年頭，均來（396）爆煲後，宏安已經有意做白武士，集團染指地產業務，有迹可尋。呢隻股，科網潮及短暫生科潮，好跟得上大勢，所以，炒友怕怕之餘，又鍾意佢跟得上潮流，有得炒。
又由於集團有地產業務在手，好似其他地產股一樣，炒宏安資產折讓，將變得合理化，家陣宏安每股資產值，講緊高達4.75元。
看通（1059）上周四公布04年度業績，純利升4成到1.5億元，折合3.5倍PE，全年息率回報5厘，有咁靚質地，邊度搵？再講兩點，看通新近拓展美國市場，當地新例規定政府及公營機構，必須喺新窄頻無線電頻道運作，美國市場將大利看通。第二，最新每股資產值0.36元，現價大折讓，科技股中，冇幾多隻。只要阿媽冠軍（092）張成績表周一蒲到頭（原本同日公布業績），冇問題，可以放心短炒看通。
錢雋