從前寂寂無聞的杜汶澤近年在影圈甚吃得開，最近又主持電台節目《在晴朗的一天出發》。談到有人覺得他寸，杜汶澤對此雖然自認招積，但他謂可能是自卑心理作祟，才會喜歡「牙擦擦認叻」，但他現已學習如何收斂脾氣，把「招積過程縮短」。
杜汶澤由寂寂無聞的亞視二打六，到現時於影壇吃得開，知名度雖然增加，但有不少人認為他「寸」，對此杜汶澤認為最多只能用「招積」來形容自己。
杜汶澤日前接受記者訪問時說：「我知有人話我寸，但我覺得自己只係招積，可能我自卑啦，反而鍾意牙擦擦同認叻，但係我冇傷害人。有邊個男人唔鍾意認叻㗎？有啲人招積完好快就還原，有啲人叻咗一次就招積成世，我𠵱家要學嘅，係點樣將招積過程縮短。」
談到演藝目標，杜汶澤竟然不揀老友黃秋生，他說：「秋生比較外露，唔係指佢嘅演技，而係佢無論做乜嘢角色，都表現到十足嘅自信，同時亦帶啲憤世。但青雲就好內斂隨和，佢一樣係有料嘅人，但畀人感覺好舒服，我相信青雲十年前並唔係咁樣，佢可能同秋生一樣，係佢嘅經歷令佢改變。」
對於現時每朝在商台主持節目《在晴朗的一天出發》，杜汶澤笑說猶如小學生般，晚上九時睡覺，早上五時許便起床，他說：「我幾鍾意講時事嘢，我又唔係想做大班（鄭經翰）喎，佢朝朝鬧人都唔係幾好啫，我寧願用取笑嘅方法挖苦吓，等大家心情好啲。」
杜汶澤和田蕊妮拍拖已五年，表面看似無風無浪，但原來曾經發生過暗湧，幸好風浪已過，杜汶澤現在更懂得珍惜眼前人。
杜汶澤說：「有段時間，我做嘢好辛苦，好少返屋企，脾氣又躁，嗰陣就差啲出事。係邊個唔好講，台前定幕後都唔好講啦，大塊田（田蕊妮暱稱）知道我有嘢，女人對呢家嘢好敏感，我坦白講畀佢聽，之後我發現都係身邊嗰個最好。」
杜汶澤現已找到心中最愛，那他跟田蕊妮又何時拉埋天窗呢？杜汶澤對此說：「我希望大塊田係同我白頭到老、生兒育女嘅人，我希望係咁。最近我好想生番個，因為受到身邊朋友劉偉強同莊文強嘅影響，但係大塊田唔想生，亦唔想結婚，佢重後生。」
談到女友的演藝事業，杜汶澤認為田蕊妮若不是他的女友，將有更好的事業發展，他說：「講真我覺得佢演技好過我，我嗰隻係表面啫，佢就真係可以做到內心戲，我亦唔贊成佢咁快做黃面婆，最近佢簽咗我間經理人公司，我覺得佢得㗎，佢早排拍嗰套《甜絲絲》，黃柏高都讚佢做得好。」
