對駱志偉這個就連英文名也喚作Rocky的攀石狂迷來說，攀石既是終身熱愛的刺激玩意，也是放假必做的例牌活動，全靠投入的一份熱情，攀石不僅帶給他賽場上的佳績，還有一個同為攀石好手的太太，以及一段相知的美滿姻緣。
記者：尹珊珊
攝影：周旭文
駱志偉，30多歲，現職西鐵工程部，20年來參加無數比賽，包括連續9年「香港運動攀登公開賽」男子高級組冠軍、「亞洲攀登錦標賽男子難度賽」最佳成績第五。
廖曉瑩，30多歲，10年前玩攀石，獲得過第十六屆「香港運動攀登公開賽」女子高級組冠軍、「星加坡運動攀登錦標賽女子難度賽」冠軍、第十屆「全國攀岩錦標賽女子難度賽」冠軍，現身兼康文署學校推廣大使。
相約駱志偉（駱仔）在太太開設的咖啡店訪問，初氣氛不算熱烈：「我慢熱，有啲內向，唔係咁鍾意講嘢。」一到咖啡室下層攀石場，身處熟悉的地方，駱仔明顯自在得多，熱切地為我們示範多個動作，高手出招，旁邊的初哥即時站定偷師，問他現時新手水準如何：「一般啦！可能𠵱家有太多玩意選擇，心態多數係玩票性質居多，未必咁專注，唔似得我哋嗰代，有機會玩攀石已經好珍惜。」
20年前，攀石仍屬小眾玩意，他憶述：「84年第一次接觸攀石，嗰年做地鐵電器學徒，同同事參加外展活動，十幾日裏面玩齊行山、獨木舟、攀石，獨獨愛上攀石，貪佢夠刺激。」4年後，駱仔在社區中心試玩初級班，自此對攀石的熱愛，猶如天雷勾動地火，一發不可收拾：「80年代重係玩天然攀岩，一放假就出去玩，到90年代中出現人工石牆，多咗地方練習，又唔使擔心天氣好唔好，之後直頭一放工就玩。」
「早幾年重有玩外展，之後一條心專攻攀石，𠵱家一有時間就會去獅子山、煙墩山同東龍島玩攀岩。」他更用3個月時間，以木板、角鐵等物料，在家自製一幅人工牆，日夜訓練望玩天然攀岩時動作更流暢。
駱仔是業餘運動員，20年來參加賽事不計其數，佳績包括曾連續9年「香港運動攀登公開賽」男子高級組冠軍、「星加坡運動攀登錦標賽」男子難度賽第二名。「玩無幾耐就膽粗粗學人參賽，記得比賽地點喺東龍島，條路線難度好高，結果初賽已經俾人Out出局啦！」為挑戰自己，他屢敗屢戰：「贏輸都好，抱平常心比賽，心願係可以喺『亞洲攀登錦標賽』奪得更高名次，𠵱家練習緊控制情緒，希望真正比賽時可以減少怯場。」
攀石還帶給他一個好老婆，同為香港運動攀登隊員的廖曉瑩（Angel）10年前玩攀石，當年的教練正是駱仔，她笑話當年：「嗰時做會計工作壓力大，普通運動已經滿足唔到我，於是揀玩當年仍然好冷門的攀石。」
在駱仔心目中，老婆一直是運動場上的最佳拍檔，而Angel亦因為駱仔的背後支持，也曾當了3年全職攀石運動員。香港缺乏資深專業教練，Angel惟有藉參加比賽增強實力，加上個性好勝，奪獎無數：「贏過咁多比賽中，最難忘係2年前嘅『全國攀岩錦標賽女子難度賽』冠軍，因為之前已經參加過四五次，唔係亞軍就季軍，每次都係差少少，好唔甘心。」突破二奶命嘗冠軍滋味，自然喜上眉梢，現時她已結束全職生涯，偕友人開設一間結合攀石元素的咖啡店，不過依然落力參與比賽。
相識五載，拍拖三年，到牽手生活第四個年頭，恩愛依舊，兩人同屬愛貓之人，一家兩口九隻貓，至少未必人人接受到；每逢比賽前夕，兩夫婦會互相鼓勵舒緩情緒，比賽期間又會為對方拍下英姿玉照，回家後細心整理，駱仔說：「我哋感情係慢慢培養而成，大家有共同嗜好，平時一定有話題，放假又可以一齊玩。」Angel則笑說：「我無佢咁狂熱，開口埋口都攀石，𠵱家重忍到佢，遲啲唔知嘞！」他倆極合拍，熱衷參加比賽之餘，就連旅行也是到外地攀石，Angel笑說：「佢同你講過我哋有去旅行咩，無，邊有呀，旅行咪又係去攀石囉！」並非驚心動魄的愛情，也沒有如電視劇的感人情節，但細水長流的婚姻生活，反教人羡慕不已。
