近年好少睇電視節目，因為真係冇乜時間睇。其實有時間的話我都想睇多啲不同類型嘅電視節目，起碼可以知道呢個世界發生緊乜嘢事。最近我就四圍問朋友借套《金枝慾孽》，又畀我搵到，不過聽講要排第四，前面有三位OL等緊。咁我朋友話不如借套同《金枝慾孽》差唔多嘅畀你睇住先啦，就係新一輯嘅《誘惑島》。真係唔講猶自可，一講就把鬼火。
我知道呢類型嘅遊戲節目喺美國好流行，由《生還者》開始到《誘惑島》到最近有一個由DonaldTrump主持，搵一班華爾街精英以淘汰形式大家鬥搵得多錢，最後勝出嗰個就畀個CEO你做。
我唔知呢啲節目有幾受歡迎，但係不斷咁製作就證明有收視。但係我覺得真係有需要對呢類型節目作出年齡限制警告同埋最好片尾加上：「以上藝人受過特別訓練，觀眾切勿模仿。」等字眼。原因好簡單，因為佢真真正正示範乜嘢叫badeducation畀大家睇。首先作為一個遊戲節目，我覺得佢有一半以上嘅內容係假嘅，即係編寫出嚟嘅劇本，目的只有一個，就係暴露人性有幾醜惡，作用係叫大家做人最緊要不擇手段同埋要精於篤背脊。
《生還者》越睇越假，班鬼佬鬼妹講多過做，一味吹水叫人信佢，咁不如大家攞把刀出嚟互斬好過，咁就真係可以睇吓邊個係生還者。睇《誘惑島》不如睇四仔冇咁嬲，橫掂都係亂咁搞，班鬼妹似係夜總會搵嚟，重指定唯一服裝贊助係個泳衣供應商。至於嗰班華爾街精英就當然係全身名牌再加套皮幾兩皮嘢嘅西裝。基本上係投射緊你唔似佢哋你就唔係人。
我唔係扮滿口仁義道德，我都覺得班製作人好犀利。但係用呢種重賞節目形式去凸顯人性醜惡我就真係唔贊同。一句講晒，係假嘅。