煲碟王：<br>《史力加2》DVD版獨加互動個唱新結局

煲碟王：
《史力加2》DVD版獨加互動個唱新結局

今年5月檔上畫的《史力加2》，現在已火速殺落碟場；早前好多人關心嘅聲效問題，隨着3區行版推出，結果亦塵埃落定，除咗有至搞笑嘅杜汶澤及張衛健配音外，喜出望外重要係5.1聲道dts（早前有傳是2聲道）；雙碟版！重要勁多Bonus、勁多嘢玩，另一驚喜是有一個全新「互動式」後延結局，史力加迷必睇！
記者：朱崇德

近幾年，夢工房同迪士尼可謂在電腦動畫界分庭抗禮；迪士尼嘅龍頭代表作有《反斗奇兵》及《獅子王》等，而夢工房嘅《蟻哥正傳》、《埃及王子》都極收旺場，不過講到最賣座嘅，當然首數《史力加》系列，而佢嘅顛覆經典童話手段，就更令人感到佢同迪士尼對着幹！新碟《史力加2》，隨碟附送有最新《鯊魚故事》預告片，極有迪士尼勁收的《海底奇兵》Feel，不過亦難掩其玩轉態度。



樣醜嚇壞老爺奶奶
承接上集故事，史力加同費安娜公主新婚燕爾，點知一返到屋企就收到夏洛父皇同母后嘅邀請，返山旮旯（讀音「山卡拉」）王國受國民祝賀；兩老估唔到自己「美如花」嘅公主，竟然變成了不折不扣的「母夜叉」，而駙馬爺史力加，更是一隻嚇壞人嘅大怪物！更麻煩的是，國王早就跟仙女教母談好婚約，讓公主嫁給魅力王子，現在半途卻殺出個史力加，國王只好晦氣地僱殺手把史力加幹掉。

■電影一開波有一段《鯊魚故事》預告片，戲院未上，DVD版預告優先場。

■顛覆經典童話，都係《史2》的任務，呢幕美人魚偷咀史力加，就好似明玩迪士尼。

■去到山旮旯咁遠見外父、外母，點知夾道歡迎嘅人，個個嚇到神情呆滯。

■第一餐晚飯，同夏洛父皇，就馬上口角。

■繼而動手嘅，係一隻着長靴嘅殺手——貓貓。

■勁爆笑貓貓絕招，扮可愛殺人大突擊。

故事追求人性探索
承襲《史力加》系列嘅優良傳統，雖然冇上集捉住蛇、吹脹佢玩扭波波呢類爆笑位，不過一樣出盡全力對經典童話人物作挖苦之能事，好似大奸角仙女教母真係有幾分「迪」的經典人物「小仙女」Feel；全劇一樣以醜人當道，發揚不可以貌取人，睇人一定要靠內心嘅精神。
第一集《史》以顛覆經典童話為手段，啟發大家去體會及珍惜內心的善良本性，不要只着重虛浮的外表；今集《史2》可謂更加重了人性的探索，全劇重點在「為你好」三個字，夏洛皇帝為個女好，所以希望幫佢搵個靚仔老公，令佢可以有一段有如仙倦之婚姻；史力加為費安娜公主好，不惜改變樣貌，甚至放棄對公主的愛；仙女教母為自己個仔好，不惜拆散鴛鴦……不過故事結尾就話畀大家知，好多為別人好的事，實情未必是別人真正希望得到的「好」，值得大家去反思。

■仙女教母外表可愛，講嘢又懶有教養，但句句夭心夭肺，好現實人版Feel。



電腦動畫　技術Upgrade
如果將《史力加》1、2兩集作比較，大家會發現新一集是增多了「人物」角色，雖知模擬人的面相動作是較難像真的，好明顯夢工房在電腦動畫的技術上有好大進步；而且Making還透露了主角史力加的面部肌肉亦增加至218條，讓他所有的表情都如真人一樣自然；此外，有些動畫技師甚至參加了演技訓練班，希望能掌握每個人物角色的情緒表達！
聲效方面，《史2》未出街前網上盛傳廣東話版是2聲道，雖知好多人喺戲院睇時，都係追住杜汶澤及張衛健配音Version睇，好彩出到嚟都係5.1聲道，相信冇人投訴啦！此外，DVD版在尾段，還特別加入了一個《FarFarAwayIdol》選舉，所有出場人物都有一段從未曝光嘅獨唱音樂片段，大家重可以投票畀邊個贏，之後重有嗰位人物嘅獨立得獎片段，真係幾搞鬼！

■人版史力加都算幾靚仔，但硬係有啲唔慣。

■三隻小豬、三盲鼠、小木偶今集都有出場，新經典童話角色好似比較欠奉。



必睇Bonus
電腦打印玩意任Download
《史2》Bonus真係多到不得了，齋MV都有十幾首，Making幕後人語就更唔少得！從未曝光片段，好似鬆毛版貓貓、長手版史力加都好搞鬼，睇得非常開心。不過論精粹所在，一定要放入電腦DVDROM，因為連上網後，可以有史力加拼圖、劇場手指公仔、月曆等Download作彩色打印，感覺隻碟更加抵！

■《FarFarAwayIdol》選舉，出場人物差不多有10名，後延結局都有近十個。

■據知電影中所有人物的衣履，全部專人設計，重要務求做到原布的質感。

■鬆毛版貓貓，都可算是電腦畫的蝦碌片段。

■貓貓係今集故事中人氣急升角色，Bonus內重有佢嘅MV，嚟緊06年《史力加3》應該會加重佢嘅戲份。

■憑DVD連上網，史力加砌圖、手指公仔任Download。