中指黃畀人跣咗一鑊冇咗財委會主席個位，保皇黨為向反骨仔泛聯盟還以顏色，捧番黃宜弘做帳目委員會主席，表面上今次分餅仔結果人人有份皆大歡喜，尤其係卿姐執到個筍位，正準備大展拳腳抽秤政府大花筒。
卿姐尚未郁手，已傳出中指黃準備復仇，更私下同老友稱只做帳委會主席一年。原來立法會各事務委員會主席年年改選，其他委員會各黨派已傾掂數，講明四年輪流揸莊，惟獨財委會主席未有共識，卿姐今年符碌贏咗，下年會唔會再有咁戲劇性結果出現呢？八方唔識未卜先知，但如今泛聯盟陳智思已入行會，怕且唔使再扭計嘞啩！
雖然中指黃可能搶番個財委會主席做，但立法會秘書處睇嚟落後於形勢，八方噚日上網睇過，財委會嘅網頁重係用緊中指黃張相（圖），話晒𠵱家嘅主席係卿姐唔係中指黃，立法會應該快啲換番卿姐張相上網。
傳真︰2623-9278
電郵︰