美國著名饒舌歌手Eminem隻新碟喺下個月先出，不過佢第二首主打歌《Mosh》日前秘密流出市面，首歌擺明寸美國總統喬治布殊，歌詞重有粗口同埋唔少侮辱字眼。Eminem繼《JustLoseIt》MV得罪米高積遜（MichaelJackson）、麥當娜（Madonna）後，今次連總統都寸埋，真係食咗豹子膽。
布殊曾經喺幾年前話Eminem教壞細路，重話佢「係繼小兒麻痹症後第二樣對小朋友最危險嘅嘢」，激到Eminem鬼咁㷫。唔知Eminem係咪有心報仇，今次整隻歌嚟寸番布殊，《Mosh》嘅歌詞句句到肉，內容包括「讓總統回應現在的混亂?讓他為自己發動的戰爭出征?不要再為石油而發動戰爭」，其間重夾雜住「F××kBush」嘅粗口。
另外，Eminem早前接受音樂雜誌《RollingStone》訪問時話，自己會喺今年投票選總統，但就一定唔會投布殊，佢話：「我哋國家有咁多人戰死，為乜？呢場戰爭簡直係越戰嘅翻版。」