《蘋果日報》（十月二十一日）頭版大標題，雞乸咁大個字︱︱「讀一個學位20萬」，左丁山一睇，為之大喜，邊度讀書有咁平㗎？可惜自己的仔女已經讀完大學（當然唔止二十萬元一個學位），冇得享受大量納稅人津貼學費咯。香港教育，全由公家包辦，學費特別便宜，可能因為平得滯，一啲中產階級、有產富豪，全部送晒子女入國際學校，仔女未入大學，已經花掉一百萬元起碼。平得滯有乜唔好？資源不夠囉、水平下降囉、學生水皮啲囉，如果唔係，做乜報紙成日批評本地教育呢度唔妥、嗰度唔妥？
喂，你有景，就話學費平，我攞綜援，買菠蘿包都成問題，怎麼辦？唔好講笑，只要有心機勤力讀書，綜援家庭一樣有仔女升上大學。大學收生，看成績，不看貧窮，窮學生入學後可以申請獎助學金、政府補助貸款，點會讀唔成書？經濟K、中貿林、賓架鄭等人成立一個大學獎學金好耐，每個獎助二萬五千元，每年畀兩個，十幾年來每年攞呢個獎學金嘅學生，冇一個係有錢仔女，多數係魚生粥，僅僅熟嗰隻。其中有好幾位都來自單親綜援家庭，佢哋攞咗獎學金之後，可能聽從學校指導，寫信嚟多謝，講番自己背景，我哋睇到眼濕濕。左丁山代眾位老友回信，講番一句：「捐款人當年同樣來自清貧或不富裕家庭，因納稅人之助，得以完成大學學業，得有今天。希望你能努力上進，二十年後捐出同樣獎學金，回饋母校，造福師弟妹。」
香港讀大學，堪稱價廉物美，以valueformoney而論，亞洲稱第一，以後（二○一一年）改為大學四年制，前景一定更好，到時讀一個四年制大學學位，只花二十萬元，抵到爛！